तोकिएकै मितिमा शान्तिपूर्ण निर्वाचन सम्पन्न गर्न सबै पक्षको सहयोग महत्वपूर्ण छ: निर्वाचन आयोग

काठमाडौँ । तोकिएकै समयमा निर्वाचन सम्पन्न गर्न सबै पक्षको सहयोग महत्वपूर्ण रहेको निर्वाचन आयोग ले जनाएको छ। आयोगले निर्धारित मिति फागुन २१ गते शान्तिपूर्ण रूपमा निर्वाचन सम्पन्न गराउन सफल भएको उल्लेख गर्दै यसमा सहयोग गर्ने सम्पूर्ण पक्षप्रति आभार व्यक्त गरेको हो।

निर्वाचनको मिति घोषणा हुँदा देशको शान्ति सुरक्षा अवस्था लगायत विभिन्न कारण देखाउँदै तोकिएको समयमा निर्वाचन हुनेमा कतिपयले आशंका व्यक्त गरेका थिए। तर नेपाली समाजको सहिष्णुता र सौहार्द्रताले ती आशंकाहरूलाई चिर्दै निर्वाचन सफलतापूर्वक सम्पन्न भएको आयोगको भनाइ छ।

आयोगका प्रवक्ता नारायणप्रसाद भट्टराई ले संविधानअनुसार आवधिक निर्वाचन गराउनु आयोगको प्रमुख दायित्व रहेको र सोही कार्ययोजना अनुसार आयोग निरन्तर सक्रिय रहेको बताए। उनका अनुसार यो सफलता आयोगको एकल प्रयासबाट मात्र सम्भव नभएको स्पष्ट पारे।

प्रवक्ता भट्टराईले नेपालका राजनीतिक दल, उम्मेदवार, आम मतदाता, सञ्चार क्षेत्र, नागरिक समाज तथा नेपाल सरकारको सहयोगका कारण तोकिएकै समयमा निर्वाचन सम्पन्न गर्न सम्भव भएको बताए।

उनले भने, “निर्वाचनको मिति घोषणा हुँदा देशको शान्ति सुरक्षाको अवस्थादेखि विभिन्न विषयले समयमा निर्वाचन हुन्छ भन्नेमा शंका गर्ने आधार थिए। तर नेपाली समाजको सहनशीलता र सौहार्द्रताले प्रगति र समृद्धिका मार्गहरू सधैं उजागर गर्ने गरेको छ।”

यस्तै, मतदानको दिन उत्साहजनक रूपमा अगाडि बढिरहेको भए पनि निर्वाचनको सम्पूर्ण प्रक्रिया अझै समाप्त नभएकोतर्फ आयोगले ध्यानाकर्षण गराएको छ। आयोगले बाँकी प्रक्रियालाई पनि सफल र व्यवस्थित ढंगले सम्पन्न गर्न सबै पक्षको सहयोग आवश्यक रहेको जनाएको छ।