काठमाडाैँ । अन्तरिम सरकारका स्वास्थ्य तथा जनसङ्ख्यामन्त्री डा. सुधा गौतमले नेपाली औषधि उद्योगहरूलाई ‘म्यासिभ प्रोडक्सन’ (व्यापक उत्पादन) तर्फ लाग्न र देशलाई औषधिमा आत्मनिर्भर बनाउन आग्रह गरेकी छन् ।
नेपालमा औषधि उद्योगको धेरै विकास भएपनि अझै थुप्रै काम गर्न बाँकी रहेको भन्दै उहाँले सरकारले यस क्षेत्रलाई आक्रामक रूपमा सहयोग गर्ने प्रतिवद्धता जनाएकी हुन् । फार्मा एक्स्पोलाई सम्बोधन गर्दै मन्त्री गौतमले नेपालका औषधि उद्योगहरूको स्तर वृद्धि गर्नुपर्ने आवश्यकता औंल्याइन् ।
हाल नेपालमा करिव ८८ वटा औषधि उत्पादक कम्पनीहरू रहेको र तीमध्ये ५० वटाले विश्व स्वास्थ्य संगठनको असल उत्पादन अभ्यास (डब्लुएचओ जिएमपी) प्रमाणपत्र पाएको बताइन् । उनले यसलाई अझै परिष्कृत गर्नुपर्ने बताइन् । आफू विगतमा स्वास्थ्य सचिव हुँदा पनि औषधि उत्पादक संघ (एपोन) लगायतका संस्थाहरूलाई उत्पादन बढाउन आग्रह गरेको स्मरण गर्दै उनले उद्योगहरू ‘अन्डर प्रोडक्सन’ (कम उत्पादन) मा बस्न नहुने बताइन् ।
मन्त्री भएर आउनासाथै आफूले एपोन, एनसिडिए लगायतका सरोकारवाला निकायलाई बोलाएर छलफल गरेको र उद्योगीका समस्या समाधान गर्न सरकार तयार रहेको उनले बताइन् ।उनले नेपालका केही निजी क्षेत्रका प्रयोगशालाहरू ‘स्टेट अफ द आर्ट’ (अत्याधुनिक र उत्कृष्ट) रहेको भन्दै प्रशंसा समेत गरिन्। निजी क्षेत्रले गरिरहेको राम्रो कामलाई सरकारले नीतिगत रूपमै संरक्षण गर्ने र गुणस्तरमा कुनै सम्झौता नगरी अगाडि बढ्ने मन्त्री गौतमको भनाइ छ ।
प्रतिक्रिया दिनुहोस्