काठमाडाैँ । पूर्वराष्ट्रपति विद्यादेवी भण्डारीले नेपालको लोकतान्त्रिक आन्दोलन र राजनीतिक परिवर्तनमा भूमिगत राजनीति गरेका महिलाहरूको योगदान अतुलनीय रहेको बताएकी छन् ।
११६ औं अन्तर्राष्ट्रिय श्रमिक महिला दिवसको सन्दर्भ पारेर मोतिदेवी स्मृति केन्द्रद्वारा आयोजित एक कार्यक्रमलाई सम्बोधन गर्दै पूर्वराष्ट्रपति भण्डारीले इतिहासको कठिन कालखण्डमा महिलाले पु¥याएको योगदानलाई राज्य र समाजले सधैँ स्मरण गर्नुपर्नेमा जोड दिएकी हुन्।
कार्यक्रममा ‘वर्गीय मुक्ति, लैंगिक समानता र सामाजिक न्यायको योद्धाः भूमिगत महिला’ नामक पुस्तक तथा वृत्तचित्र सार्वजनिक गर्दै उनले समाजको प्रगतिशील रूपान्तरणका लागि महिलाहरूले खेलेको भुमिकाको उच्च प्रशंसा गरिन्। राजनीतिक परिवर्तनमा नेतृत्व तहमा पुगेकाहरूलाई मन्दिरको गजुरसँग तुलना गर्दै उहाँले जग खन्ने महिलाहरूको पसिना पनि सम्झनुपर्ने बताइन् ।
गजुर जतिसुकै उज्यालो देखिए पनि त्यसलाई थामेर राख्ने जग खन्दा पसिना बगाउने हातहरूको पौरख र योगदान सदा स्मरणीय र सम्मानित हुने उनको भनाइ छ ।
नेपालले प्राप्त गरेको संघीय लोकतान्त्रिक गणतन्त्र तिनै योद्धाहरूको योगदानको जगमा उभिएको दाबी गर्दै उनले यस्ता ऐतिहासिक अभिलेखीकरणले भावी पुस्तालाई न्याय, समानता र स्वतन्त्रताको मार्गमा अगाडि बढ्न निरन्तर प्रेरणा दिने विश्वास व्यक्त गरिन् ।
प्रतिक्रिया दिनुहोस्