नेपालकै धनी र व्यवस्थित शहर बन्दै पोखराः हरेक नागरिकको अवस्था अब महानगरको हातमा

काठमाडाैँ । पोखरा महानगरपालिकाले सुशासन र तथ्यमा आधारित योजना तर्जुमातर्फ महत्वपूर्ण प्रगति गरेको छ। महानगरले पहिलोपटक ‘प्राइमरी डेटा’ सङ्कलन गरी हरेक घरपरिवारको विस्तृत विवरण तयार पारेपछि विकास योजनालाई अझ प्रभावकारी बनाउने आधार तयार भएको जनाएको छ।

मेयर धनराज आचार्यका अनुसार विगतमा पोखराभित्र कति घर छन् र नागरिकको आर्थिक अवस्था कस्तो छ भन्ने विषय अनुमानका भरमा सञ्चालन हुँदै आएको थियो। तर अहिले महानगरले प्रत्यक्ष तथ्याङ्क संकलन गरेर हरेक घरको वास्तविक अवस्था अभिलेखीकरण गरेको छ।

संकलित तथ्याङ्कअनुसार पोखरा महानगरपालिकाभित्र कुल १ लाख ४८ हजार ७२५ घरधुरी रहेका छन्। यस क्रममा कुन घर गरिबीको रेखामुनि छन्, को बेरोजगार छन्, को रोजगार छन् र परिवारको आर्थिक अवस्था कस्तो छ भन्ने विस्तृत विवरण समेत तयार गरिएको महानगरले जनाएको छ।

मेयर आचार्यले उक्त तथ्याङ्कले लक्षित वर्गका लागि प्रभावकारी योजना बनाउन सहज बनाएको र पोखरालाई आर्थिक रूपमा सुदृढ शहरको रूपमा विकास गर्न आधार प्रदान गरेको बताए। उनका अनुसार अब अनुमानका आधारमा बजेट विनियोजन गर्ने पुरानो अभ्यास अन्त्य हुँदै तथ्यमा आधारित विकास मोडेल लागू गरिएको छ।

महानगरले तयार पारेको यो डेटाबेसले राजश्व सङ्कलन, शहरी योजना निर्माण तथा सामाजिक सुरक्षा कार्यक्रम सञ्चालनमा महत्वपूर्ण सहयोग पुर्‍याउने विश्वास गरिएको छ।