जनपक्षीय काममा सरकारलाई समर्थन, विधि मिचिए सचेत गराउने काँग्रेसको निर्णय

काठमाडाैँ । नेपाली काँग्रेस संसदीय दलले सरकारले ल्याउने जनपक्षीय कामहरूलाई समर्थन गर्ने तर विधि र कानून मिचिएमा सचेत गराउने निर्णय गरेको छ । 

नयाँ निर्वाचित संसदको पहिलो संयुक्त संसदीय दलको बैठकपछि सञ्चारकर्मीहरूसँग कुरा गर्दै राष्ट्रिय सभाका सांसद कृष्णबहादुर रोकायले यस्तो जानकारी दिएका हुन् ।

सिंहदरबारमा बसेको बैठकमा पार्टीको आगामी भुमिका र संसदमा सांसदहरूको सक्रियताका विषयमा घनिभुत छलफल भएको उनले बताए । तर सरकारले कतै विधि र कानून मिच्ने ढंगले जनता र देशलाई अहित हुने कुरा ल्याएमा काँग्रेसले कडा रूपमा सचेत गराउने उनको भनाइ छ । बैठकमा संसदमा पार्टीको उपस्थितिलाई कसरी प्रभावकारी बनाउने भन्ने विषयमा पनि सांसदहरूबीच छलफल भएको छ । 

उनले भने, “नयाँ निर्वाचित संसदको पहिलो संसदीय दलको बैठक हो । यो बैठकमा नेपाली काँग्रेस पार्टी कसरी जाने भन्नेमा संयुक्त संसदीय दलको बैठक बस्यो र अन्य विषयमा पनि छलफल भएको छ । नेपाली काँग्रेसका सांसदहरुले आफ्नो भुमिकालाई सक्रियतापूर्वक प्रश्तुत गर्ने र सरकारले ल्याउने हरेक कदमहरु, जनता, देशको पक्षमा ल्याउने जनपक्षिय कामहरुलाई समर्थन गरेर जाने र यदी कतै विधिलाई, कानून मिच्ने ढंगले जनता र देशलाई अहित हुनेकुरा ल्याए हामी सचेत गराउँछौँ ।”

उनकाअनुसार बैठकमा पार्टीको संयुक्त संसदीय दलको बैठकले आगामी दिनमा संसदमा खेल्नुपर्ने भुमिका र जनताका जल्दाबल्दा समस्याहरूलाई कसरी उठाउने भन्नेमा साझा धारणा बनाएको छ ।