क्वाइनवेशले अमेरिकी मुद्रा नियन्त्रक कार्यालय (ओसिसी) बाट ट्रस्ट बैंकको रूपमा सञ्चालन गर्न सशर्त स्वीकृति प्राप्त गरेको छ।
यदि यो अन्तिम रूपमा पारित भए क्रिप्टो एक्सचेन्जले संघीय नियन्त्रणमा आफ्नो संरक्षण (कस्टडी) व्यवसायका अतिरिक्त भुक्तानी उत्पादनहरू पनि सञ्चालन गर्न सक्षम हुनेछ।
कम्पनीले व्यावसायिक बैंक नबन्ने, साधारण मानिसबाट निक्षेप नलिने, वा फ्र्याक्सनल रिजर्भ बैंकिङ (जसमा बैंकले ग्राहकको अधिकांश निक्षेप बाहिर ऋण दिन्छ) मा संलग्न नहुने जनाएकाे छ । ट्रस्ट चार्टरले यसलाई कानुनी अधिकार, बैंकिङ पूर्वाधारमा पहुँच, र नियामकीय विश्वसनीयता प्रदान गर्नेछ । जसले पेपाल वा स्क्वायरसँग प्रतिस्पर्धा गर्न मद्दत पुर्याउन सक्छ।
यो स्वीकृति एक प्रारम्भिक सम्झौता हो जसले क्वाइनबेसको आवेदन प्रमुख नियामकीय आवश्यकताहरू पूरा गरेको संकेत गर्छ। क्वाइनबेश अब राज्य-आधारित नियमनको सट्टा प्रत्यक्ष रूपमा ओसीसी (जो तीनवटा मुख्य संघीय बैंकिङ नियामक मध्ये एक हो) द्वारा विनियमित हुनेछ।
राज्य-अनुसारको नियमनले द्रुत गतिमा विकसित हुने क्रिप्टोजस्ता उद्योगका कम्पनीहरूको लागि ठूलो टाउको दुखाइको विषय रहेको थियो।
क्वाइनबेसको भुक्तानी रणनीति स्टेबलक्वाइन (विशेषगरी सर्कलले जारी गरेको यूएसडीसी) लाई मुख्यधाराको विश्वव्यापी भुक्तानी माध्यम बनाउने केन्द्रित रहेको छ।
गत वर्ष, यसले क्वाइनबेस पेमेन्ट्स लन्च गर्यो, जुन प्लेटफर्म र व्यापारीहरूको लागि वालेट इन्टिग्रेसन र स्टेबलक्वाइन चेकआउट भएको उत्पादन हो।
साथै, यसले आफ्नो ब्लकचेन ‘बेस’ मा निर्मित शपिफाईसँग भुक्तानी प्रोटोकल पनि लन्च गर्यो। क्वाइनबेसका सीईओ ब्रायन आर्मस्ट्रङले कम्पनीको लक्ष्य यूएसडीसीलाई विश्वको पहिलो नम्बरको स्टेबलक्वाइन बनाउने र क्वाइनबेसलाई आगामी केही वर्षमा “विश्वको पहिलो नम्बरको वित्तीय सेवा एप” बनाउने रहेको बताएका छन्।
प्रतिक्रिया दिनुहोस्