काठमाडाैँ । प्रमुख प्रतिपक्ष दल नेपाली काँग्रेसका सांसद प्रकाश सिंह कार्कीले सरकारले उद्योग सञ्चालन गर्ने नभई निजी क्षेत्रलाई लगानी र उद्योग सञ्चालनका लागि उपयुक्त वातावरण निर्माण गरिदिनुपर्ने बताएका छन् ।
मंगलबारको प्रतिनिधि सभा बैठकमा बोल्दै सांसद कार्कीले विकासको परम्परागत परिभाषा बदल्नुपर्ने आवश्यकता रहेको बताएका हुन् । बैठकमा विशेष समय लिएर बोल्दै सांसद कार्कीले सडक, पुल, सुरुङ र विमानस्थल जस्ता भौतिक पूर्वाधारको निर्माण आवश्यक भएपनि ती पूर्वाधारले नेपाली उत्पादन र रोजगारीमा पु¥याएको योगदानको समीक्षा गर्नुपर्ने बताए।
सरकारको भुमिका ‘व्यापारी’ बन्ने नभई ‘सहजकर्ता’ बन्ने हुनुपर्ने धारणा राख्दै कार्कीले निजी क्षेत्रलाई आर्थिक साझेदारका रूपमा हेर्न आग्रह गरे । मुलुकको कुल गार्हस्थ उत्पादन (जीडीपी) मा ८० प्रतिशतभन्दा बढी योगदान पु¥याइरहेको निजी क्षेत्रलाई शङ्काको दृष्टिले हेर्न नहुने उनको तर्क छ ।
सांसद कार्कीले भने, “हामीले विकासलाई सिमेन्ट र डन्डीमा मात्र नाप्न थाल्यौँ, जसले गर्दा देशको विकास भन्दा पनि विकासको बिल मात्र बढेको देखिन्छ । अब सडकले उत्पादनलाई बजारसम्म पु¥याउने र सुरुङले व्यापारको लागत घटाउने गरी प्राथमिकता निर्धारण गर्नुपर्छ । सरकारले कारखानाका मेसिन चलाउने होइन, नीति र कानुनको मेसिनरी चलाएर निजी क्षेत्रलाई उद्योग चलाउने वातावरण दिनुपर्छ । निजी क्षेत्रलाई नाफा कमाउन दिने तर कर तिर्ने र रोजगारी सिर्जना गर्ने गरी बाध्यकारी कानूनी दायरामा राख्नुपर्छ ।”
घाटामा रहेका सरकारी उद्योगहरूका सम्बन्धमा टिप्पणी गर्दै सांसद कार्कीले वर्षौँसम्म जनताको करबाट घाटा पूर्ति गरेर उद्योग चलाउनु समाधान नभएको बताए । सम्भावना भएका उद्योगहरूलाई पारदर्शी प्रतिस्पर्धाका माध्यमबाट निजी क्षेत्रलाई व्यवस्थापनको जिम्मेवारी दिन उनले सुझाव दिए ।
प्रतिक्रिया दिनुहोस्