काठमाडाैँ । राष्ट्रिय स्वतन्त्र पार्टीका सांसद तथा पर्वतारोही मिङ्मा ग्याबु शेर्पाले दक्ष पर्वतारोही तथा हिमाली पथप्रदर्शकहरू (माउण्टेन गाइड) लाई विदेश पलायन हुनबाट रोक्न सरोकारवाला निकायहरु एकजुट हुन आवश्यक रहेको बताएका छन् ।
सगरमाथा आरोही संघको २५ औँ वार्षिकोत्सवका अवसरमा आईतवार राजधानीमा आयोजित कार्यक्रममा बोल्दै उनले यस्तो बताएका हुन् । उनले हिमाली पथप्रदर्शकहरूलाई उचित पारिश्रमिक र पर्वतारोहीलाई उचित सम्मानको वातावरण बनाउन नसके पर्वतीय पर्यटनका क्षेत्रमा विडम्बनापूर्ण चुनौतीको सामना गर्नुपर्ने बताए ।
उनले २०३५ सालमा बनेको पर्यटन ऐनकै आधारमा मुलुकको पर्यटन क्षेत्र सञ्चालन हुँदै आएकोमा अहिले नयाँ ऐन बन्न लागेकोमा खुशी समेत व्यक्त गरे । उनले सोमबार संसदीय समितिको बैठकमा पर्यटन विधेयकमाथि सरोकारवाला निकायहरुसँग छलफल भइरहेको जानकारी दिँदै पर्वतारोहीका समस्या र अधिकार ऐनमा कसरी समेट्ने ? भन्ने विषयमा आफ्ना सुझाव राख्न समेत आग्रह गरे । व्यक्तिगत स्वार्थ र राजनीतिभन्दा माथि उठेर पर्वतारोहण क्षेत्रको अधिकार तथा नेपालको पर्यटन क्षेत्रको भविष्यका विषयमा सबैले काम गर्नुपर्ने आवश्यकता रहेको पनि बताए ।
उनले भने, “२०३५ सालमा बनेको पर्यटन ऐनकै आधारमा मुलुकको पर्यटन क्षेत्र चलिरहेको छ । अहिले त्यो ऐन परिवर्तन गर्ने ठाउँमा पुगेको छु । र पर्यटन विधेयकमा भोलिमात्रै सरोकारवाला निकायहरुसँग छलफल हुँदैछ । आरोहीहरुको समस्या ऐनमा कसरी समेट्नुपर्छ भन्ने कुरालाई ध्यानमा राखेर आफ्नो सुझाव दिन समेत आग्रह गर्दछु । तपाईंहरुले आफ्नो अधिकारको लागि आफेनो स्पष्टसँग माग राख्नुभएन भने तपाईंहरु त्यो संस्थामा बस्नुको कुनैपनि औचित्य हुनेछैन । कुनैपनि व्यक्तिगत स्वार्थ र राजनीतिबाट अलग रहेर पर्वतारोही क्षेत्रको अधिकार, नेपालको पर्यटन क्षेत्रको भविष्यको विषयमा आफ्नो कुरा तपाईंहरुले राख्नुभयो भने त्यसैअनुसार ऐन बन्न सहजता हुनेछ । म सधैं तपाई हाम्रो क्षेत्रमा रहेका समस्याको समाधानका लागि प्रतिबद्ध छु । प्राकृतिक रुपमा हामीसँग पर्याप्त हिमाल हुँदाहुँदै पनि हामीले पर्वतारोहीलाई रोक्न सकिरहेको अवस्था छैन । त्यसकारण पर्वतारोहण क्षेत्रमा नीतिगत तहबाट सुधार गर्नुपर्छ । पर्वतरोही र पर्यटनको क्षेत्रमा तथा पर्वतारोहीलाई पलायन हुनबाट रोक्नका लागि हामी सबै एकजुट भएर अगाडि बढ्न सकेनौँ भने अझ विडम्बनापूर्ण दिनहरु आउनसक्छन् ।”
उनले पर्वतारोहण नेपालको पर्यटनको अभिन्न अंग रहेको भन्दै यस क्षेत्रमा रहेका समस्या समाधान गर्न आफू क्रियाशील रहने प्रतिवद्धता समेत व्यक्त गरे ।
प्रतिक्रिया दिनुहोस्