काठमाडौं । उत्तरी नेपालमा बाढी तथा पहिरोबाट ठूलो क्षति भएपछि चीनले खोज तथा उद्धार कार्यमा सहयोग पुर्याउन राहत सामग्रीसँगै तालिमप्राप्त उद्धारकर्मी नेपाल पठाएको छ।
चिनियाँ सैन्य विमानमार्फत आइतबार त्रिभुवन अन्तर्राष्ट्रिय विमानस्थलमा राहत सामग्रीको पहिलो खेप ल्याइएको हो। सामग्रीसँगै चार जना चिनियाँ सुरुङ उद्धार विशेषज्ञ पनि काठमाडौं आएका छन्।
चिनियाँ सञ्चारमाध्यम सीजीटीएनका अनुसार चीनले पठाएको राहत सामग्रीमा तत्काल आवश्यक पर्ने टेन्ट, कम्बल, सुत्ने झोला, प्याकेटबन्दी खाना तथा प्राथमिक उपचारका सामग्री छन्।
नेपालमा जारी खोज तथा उद्धार अभियानमा चिनियाँ उद्धार टोलीले आवश्यक प्राविधिक सहयोग गर्ने जनाइएको छ। विशेषगरी सुरुङ तथा कठिन भौगोलिक क्षेत्रमा उद्धारका लागि उनीहरूको विशेषज्ञता उपयोगी हुने अपेक्षा गरिएको छ।
सीजीटीएनले एनडीआरआरएमएको तथ्यांक उद्धृत गर्दै अगस्ट २६ मा नेपालको उत्तरी क्षेत्रमा आएको पहिरोमा ६ सय ७५ जनाको मृत्यु भएको र २ हजार ४ सय ९८ जना बेपत्ता रहेको जनाएको छ।
विपद्पछि चीनले नेपाललाई निरन्तर उद्धार तथा राहत सहयोग गर्दै आएको छ। पछिल्लो सहयोगले प्रभावित क्षेत्रमा तत्काल आवश्यक राहत उपलब्ध गराउन तथा खोज तथा उद्धार अभियानलाई थप प्रभावकारी बनाउन सहयोग पुग्ने अपेक्षा गरिएको छ।
प्रतिक्रिया दिनुहोस्