काठमाडौँ । सरकारले विद्युतीय सवारी साधनको अन्तःशुल्क र भन्सार दरमा परिवर्तन गरेको हो ।
मंगलबार संसदमा अर्थमन्त्री वर्षमान पुनले प्रस्तुत गरेको आर्थिक विधेयकमा विद्युतीय सवारी साधनको करमा केही परिवर्तन गरेका हुन् । आर्थिक विधेयक अनुसार ५० किलोवाटससम्मको गाडीमा यसअघि अन्तःशुल्क लाग्दैन थियो। अब भने पाँच प्रतिशत अन्तःशुल्क लाग्ने भएको छ। यससँगै सबै विद्युतीय गाडीमा कर लाग्ने भएको हो।
५० किलोवाटसम्मको मोटर भएका विद्युतीय गाडीमा पनि भन्सार बढाइएको छ भने अन्तःशुल्क लगाइने छ । उक्त मोटर क्षमता भएको ईभीमा १० प्रतिशत रहेको भन्सार महसुल १५ प्रतिशत पुर्याइएको छ ।
५० देखि १०० किलोवाट मोटर क्षमता भएका विद्युतीय गाडीमा भन्सार र अन्तःशुल्क दुईमा समान ५ प्रतिशतले बढाइएको छ । उक्त क्षमताका ईभीमा अनएसेम्बल्ड अन्तःशुल्क नलाग्ने व्यवस्था रहेकोमा अब १५ प्रतिशत लाग्ने भएको छ । सोही क्षमताका अन्य ईभीमा १० प्रतिशत रहेको अन्तःशुल्क १५ प्रतिशत पुग्दा उक्त क्षमताका अनएसेम्बल्ड र अन्य दुवैमा भन्सार १५ प्रतिशतबाट २० प्रतिशत पुर्याइएको छ ।
१०० देखि २०० किलोवाट क्षमतायुक्त विद्युतीय गाडीमा भन्सार १० प्रतिशतले बढ्दा अन्तःशुल्क भने यथावत राखिएको छ । उक्त मोटर क्षमताको अनएसेम्बल्ड विद्युतीय गाडीमा यसअघि अन्तःशुल्क नचलाए पनि अब २० प्रतिशत लाग्ने भएको छ भने तयारी भएर पैठारी हुनेको अन्तःशुल्क २० प्रतिशत नै यथावत छ ।
तर, १०० देखि २०० किलोवाट मोटर क्षमतायुक्त विद्युतीय गाडीको भन्सार महसुल भने २० बाट ३० प्रतिशत पुगेको हो । बढेको भन्सार अनएसेम्बल्ड र अन्य दुवैका लागि हो ।
त्यसैगरि २०० किलोवाटभन्दा बढीको मोटर क्षमता भएका भन्सार बढ्दा अन्तःशुल्क भने घटेको छ । उक्त मोटर क्षमता भएका ईभीमा अनएसेम्बल्ड र अन्य दुवै प्रकारमा भन्सार ४० प्रतिशतबाट २० प्रतिशत बिन्दुले बढेर ६० प्रतिशत पुग्दा अन्तःशुल्क १० प्रतिशत बिन्दुले घटेको छ ।
उक्त क्षमताको अनएसेम्बल्ड विद्युतीय गाडीमा अन्तःशुल्क शून्य रहेकोमा अब ३५ प्रतिशत लाग्ने भएको छ भने अन्यमा ४५ प्रतिशत रहेकोमा अन्तःशुल्क ३५ प्रतिशतमा घटेको हो ।
३०० किलोवाटभन्दा धेरै मोटर क्षमता भएका ईभीमा पनि २० प्रतिशत बिन्दुले भन्सार महसुल बढाउँदा अन्तःशुल्क भने १० प्रतिशत बिन्दुले घटेको छ ।
उक्त मोटर क्षमतायुक्त विद्युतीय गाडीको भन्सार महसुल ६० बाट ८० प्रतिशत पु-याउँदा अन्तःशुल्क भने ६० बाट ५० प्रतिशतमा झरेको छ । यसमा अनएसेम्बल्ड भए अन्तःशुल्क नलाग्ने हालको व्यवस्थामा अब भने त्यसमा पनि ५० प्रतिशत अन्तःशुल्क लाग्ने भएको छ ।
प्रतिक्रिया दिनुहोस्