नाडा र प्रादेशिक एसाेसिएसनबिच अटोमोबाइल क्षेत्रका चुनौतीबारे अन्तरक्रिया सम्पन्न

काठमाडाैँ । नाडा अटोमोबाइल्स एसाेसिएसन अफ नेपालले आफ्नो संस्थागत (प्रदेश) एसाेसिएसनहरूसँग अन्तरक्रिया कार्यक्रम सम्पन्न गरेको छ। लुम्बिनी अटोमोबाइल्स एसाेसिएसन अफ नेपालसँगको सहकार्यमा बुटवल, रुपन्देहीमा आयोजित उक्त कार्यक्रममा नाडा अध्यक्ष करण चौधरीको प्रमुख आतिथ्यमा अटोमोबाइल क्षेत्रका समसामयिक विषयमा विस्तृत छलफल भएको थियो।

कार्यक्रममा सहभागी संस्थागत एसाेसिएसनका पदाधिकारीहरूले अटोमोबाइल व्यवसायमा देखिएका विभिन्न समस्या उठाएका थिए। कर तिर्ने व्यवसायीहरू सरकारी तहमै सम्मान नपाएको, सीमापारिबाट आउने अटोमोबाइल प्राविधिज्ञहरूले साना व्यवसायीहरूलाई असर गरेको, बैंकहरूले ऋण दिन सहज नभएको, यातायात कार्यालयहरूमा लाइसेन्स वितरणको समस्या यथावत रहेको, खुला सिमानाका कारण सस्तो मूल्यका सवारीसाधन नेपाल भित्रिनुले स्थानीय व्यवसायमा असर परेको जस्ता विषयमा छलफल गरिएको थियो।

अध्यक्ष चौधरीले अन्तरक्रिया कार्यक्रममा उठेका प्रश्नहरूको जवाफ दिँदै नाडाले व्यवसायीहरूको माग सम्बोधन गर्न सरकारसँग निरन्तर संवाद गरिरहेको जानकारी दिए। उनले सरकारले हालै अध्यादेशमार्फत ल्याएको ऐनले धेरै मागहरू सम्बोधन गरेको बताउँदै सन्दर्भ मूल्य सूचीलाई समयसापेक्ष बनाउने विषयमा सरकारलाई निरन्तर दबाब दिइरहेको उल्लेख गरे।

नाडाले नेपाल, भारत, भुटान र बंगलादेशबिचको बीबीआइएन सम्झौताले नेपाली अटोमोबाइल व्यवसायमा पार्ने प्रभावबारे सरकारलाई अवगत गराइसकेको उनले जानकारी दिए। भारतमा आयोजित ‘मोबिलिटी’ सम्बन्धी कार्यक्रममा नाडाले एक्मा र एयसडिसीसँग भएको सहमतिबारे पनि उनले जानकारी गराए।

कार्यक्रममा लुम्बिनी अटोमोबाइल्स एसाेसिएसन अफ नेपालका अध्यक्ष गणेश भट्टराईले स्वागत मन्तव्य दिएका थिए भने सञ्चालन नाडाका महासचिव सुरेन्द्रकुमार उप्रेतीले गरेका थिए। धन्यवाद ज्ञापन नाडाका उपाध्यक्ष राजनबाबु श्रेष्ठले गरेका थिए।

कार्यक्रममा नाडाका संस्थागत उपाध्यक्ष तेजनारायण साह, संस्थागत सदस्य कृष्णप्रसाद श्रेष्ठ, भद्र भण्डारी, केन्द्रीय कार्यसमिति सदस्य नवराज भुषाल, प्रकाश कपुर, सुनिल रिजाल, निलमणि पाठक, मेघराज पौडेल, नारायणप्रसाद पाण्डे लगायत विभिन्न पदाधिकारीहरूको उपस्थिति रहेको थियो।

लुम्बिनी अटोमोबाइल्स एशोसिएशन अफ नेपालका वरिष्ठ उपाध्यक्ष रोशन पाण्डे, महासचिव राम बेलवासे, सचिव विवेक श्रेष्ठ, कोषाध्यक्ष नारायण पाण्डे, सहकोषाध्यक्ष चन्द्रदीप जोशी लगायत पदाधिकारी तथा सदस्यहरू कार्यक्रममा सहभागी थिए।

नाडाले यस्ता अन्तरक्रिया कार्यक्रमहरूलाई निरन्तरता दिँदै जाने जनाएको छ। उक्त कार्यक्रम आगामी फागुन ३ गते बुटवलमा आयोजना हुने लुम्बिनी अटोमोबाइल्स एसाेसिएसन अफ नेपालको चौथो वार्षिक साधारण सभाको सन्दर्भमा आयोजना गरिएको हो।