काठमाडौँ । देशभरका १२३ स्थानीय तहहरूले स्थानीय विशेषता, स्रोत, र सेवामा जोड दिँदै पालिकालाई खानामा आत्मनिर्भर बनाउने तथा कृषिबाट आम्दानी र रोजगारी बढाउन व्यावसायिक खेती प्रवर्द्धन गर्ने प्रतिबद्धता व्यक्त गरेका छन्।
नेकपा माओवादी केन्द्रको आयोजनामा गत फागुन १० र ११ गते राजधानीमा सम्पन्न अभिमुखीकरण कार्यक्रममा पार्टीका अध्यक्ष, उपाध्यक्ष, अधिकांश केन्द्रीय समिति पदाधिकारीहरू, प्रदेश इन्चार्जहरू तथा माओवादीले जितेका पालिकाका प्रमुख, उपप्रमुख, र पार्टी अध्यक्षहरूको उपस्थिति रहेको थियो।
कार्यक्रममा विभिन्न विषय विज्ञहरूले कार्यपत्र प्रस्तुत गरेका थिए। ‘खाना र खेतीपातीः स्थानीय सरकारको कार्यभार’ विषयमा खाद्यको लागि कृषि अभियानका संयोजक उद्धव अधिकारीले कार्यपत्र प्रस्तुत गर्दै नेपालमा कृषि र खाद्य सुरक्षाका विद्यमान समस्या, नीति तथा योजनाका चुनौतीहरू, र स्थानीय सरकारहरूको भूमिका उजागर गरेका थिए ।
कृषि अभियानका संरक्षक कृषिविज्ञ कृष्ण पौडेल र अभियान सदस्य सुजाता तामाङको समेत उपस्थिति रहेको कार्यक्रममा पालिकाहरूले कृत्रिम रसायन, हर्मोन, विषादी तथा प्लास्टिकको उपयोगको मापदण्ड तथा अनुगमन गर्ने, किसान तथा कृषि उद्यमीको पहिचान र वर्गीकरण गरी सरकारी सेवा सहज बनाउने तथा खेतीयोग्य जमिन बाँझो नछाड्ने प्रतिबद्धता जनाए।
अभियानले उठाएका कृषिसम्बन्धी समसामयिक विषयहरूलाई स्थानीय सरकारमार्फत कार्यान्वयन गर्न गरिएको प्रतिबद्धताले कृषि क्षेत्रका सरोकारवालाहरूलाई थप उत्साहित बनाएको छ ।
प्रतिक्रिया दिनुहोस्