काठमाडौँ । प्रधानमन्त्री केपी शर्मा ओलीले गौतमबुद्ध अन्तर्राष्ट्रिय विमानस्थलको दिगो र प्रभावकारी सञ्चालनका लागि सरकारले सम्बद्ध निकायहरूसँग समन्वय गर्दै कार्ययोजना बनाइ कार्यान्वयन गरिरहेको बताएका छन्।
प्रतिनिधिसभाको बैठकमा सांसदहरूको प्रश्नको जवाफ दिने क्रममा प्रधानमन्त्री ओलीले विमानस्थललाई पूर्ण क्षमतामा सञ्चालन गर्ने लक्ष्यसहित विभिन्न सहुलियत र प्रोत्साहन कार्यक्रमहरू अघि बढाइएको जानकारी दिए। उनका अनुसार यात्रु सेवा शुल्कमा छुट, ग्राउन्ड ह्यान्डलिङ, ल्यान्डिङ, पार्किङ, र नेभिगेसन शुल्कमा छुट जस्ता उपायहरू लागू गरिएका छन्।
हाल अलजजिरा, फ्लाई दुवई, एअर एसिया र नेपाल एअरलाइन्स ले गौतमबुद्ध अन्तर्राष्ट्रिय विमानस्थलबाट अन्तर्राष्ट्रिय उडानहरू सञ्चालन गरिरहेका छन्। प्रधानमन्त्री ओलीले वैदेशिक रोजगारीमा जाने नेपालीहरूलाई सहजीकरण गर्न श्रम तथा रोजगार कार्यालय बुटवलबाट श्रम स्वीकृति प्रदान गर्न थालिएको जानकारी पनि दिए।
यात्रुहरूको सुविधाका लागि अध्यागमन, मुद्रा सटही लगायतका बैंकिङ सेवाहरू विमानस्थलमै उपलब्ध गराइने व्यवस्था मिलाइएको छ। प्रधानमन्त्री ओलीले विमानस्थलको पूर्ण क्षमतामा सञ्चालनका लागि आगामी दिनमा थप पूर्वाधार निर्माण र व्यवस्थापन सुधारका कामहरूलाई तीव्रता दिने प्रतिबद्धता व्यक्त गरे।
प्रतिक्रिया दिनुहोस्