काठमाडौं। सिन्धुलीको सुनकोशी गाउँपालिका १ आँपघारीमा स्थानीय र क्रसर व्यवसायीबिच मुठभेट भएको छ ।
सो स्थानमा सञ्चालित क्रसर उद्योगहरुलाई पूर्वसर्त पालन गर्नुपर्ने भन्दै स्थानीयहरू ज्ञापन पत्र बुझाउन गएका थिए ।
ज्ञापनपत्र बुझाउन जाँदा क्रसर उद्योगका सञ्चाल, कर्मचारी र बाहिरबाट गुण्डा ल्याएर स्थानीयहरुलाई धम्काउने काम गरेको स्थानीय विकास भण्डारीले आराेप लगाए ।
“२० वर्षदेखि क्रसर चलिरहेको र हामी स्थानीयहरुले विरोध गरिरहेका छौं । बुधबार काभ्रे र सिन्धुलीको सीमाना देविस्थान फाँटका १०० मुली र वरिपरीका स्थानीयहरु मिलेर ज्ञापनपत्र बुझाउन गएका थियौं,” उनले भने, “गत असोजमा आएको बाढी पहिरोले फाँट बगायो त्यसलाई नियन्त्रण गर्न उद्योगहरुले मेशिन दिएर सहयोग गर्नको लागि अनुरोध गर्न स्थानीयहरु क्रशर उद्योगमा गएको थियौं । त्यसमा उद्योगका कर्मचारी, गुण्डाहरु लगाएर स्थानीयहरु माथि आक्रमण गर्न आएका थिए ।”
वडाध्यक्ष रामकुरा श्रेष्ठ, नेपालथोक प्रहरी चौकीका विष्णुराज थोकरसम्मलाई राखेर ज्ञापनपत्र बुझाउन गएका थिए ।
ज्ञापनपत्र बुझाउन जाँदा उद्योगका कर्मचारी, सञ्चालक र बाहिरबाट आएका गुन्डाहरुले धम्काउने, बलजफ्ती गर्नेे, मुख छाड्ने, अभद्र व्यवहार गर्ने, जे पनि गर्नसक्ने भन्दै धम्काउँदै अमानविय ढङ्गले जसरी पनि सञ्चालन गर्ने भन्ने हिसाबले अगाडी बढेको स्थानीय विकास भण्डारीले बताए ।
विगतमा उद्योग र स्थानीय बिच भएको सम्झदारी, उदोगबाट प्रभावित क्षेत्रहरुलाई सामान्य आर्थिक सहयोग, बाटोको स्तरोन्नती, बाँध निर्माण गर्ने सम्झौता भएको थियो ।
सोही सम्झौता कार्यान्वयन गर्न स्थानीहरु क्रशर उद्योगीहरुलाई ज्ञापनपत्र बुझाउन गएका थिए । पूर्व सम्झौताहरू पालन गर्नुपर्ने भन्दै स्थानीयहरू गएका थिए ।
जटिल अवस्था हुँदा पनि प्रहरी समयमा नआएको स्थानीयहरुले गुनासो गरेका छन् तर नेपालथोक प्रहरी चौकीका इन्चार्ज विष्णुराज थोकरले प्रहरीको काम शान्ति सुरक्षा दिने भएकोले समयमै गएर सुरक्षा दिएको बताए ।
प्रतिक्रिया दिनुहोस्