काठमाडाैँ । देशभरका निर्माणाधीन सडक आयोजनाहरू भौतिक तथा वित्तीय प्रगति निराशजनक रहेको छ । बिहीवार सिंहदरबारमा बसेको संघीय संसदको संयुक्त समितिमा प्रतिनिधि सभाका सचिव हर्कराज राईले पेश गरेको विवरणमा सरकारी लक्ष्यअनुसार सडक आयोजनाहरूको भौतिक र वित्तीय प्रगति नदेखिएकाे हो ।
सरकारको आर्थिक वर्ष २०७९\०८० को वार्षिक प्रतिवेदनमाथिको छलफलमा सडक आयोजनाहरूको प्रगति विवरण सार्वजनिक गर्दै समिति सचिव समेत रहेका राईले कालिगण्डकी कोरिडोर (बेनि–जोमसोम) सडक आयोजनाको भौतिक प्रगति ७३ प्रतिशत र वित्तीय प्रगति ७० प्रतिशत रहेको बताए ।
उनकाअनुसार कर्णाली कोरिडोर (हिल्सा–सिमिकोट) सडक योजनाको भौतिक प्रगति २४ प्रतिशत र वित्तिय प्रगति २०.४१ प्रतिशत तथा नागढुङ्गा सुरुङमार्ग निर्माण आयोजनाको भौतिक प्रगति ६२.५ प्रतिशत र वित्तिय प्रगति ५६.९ प्रतिशत रहेको छ । उनले नारायणगढ–बुटवल सडकखण्डको भौतिक प्रगति ३७.१ प्रतिशत र वित्तिय प्रगति २४.८ प्रतिशत रहेको बताए । काठमाठौं–तराई–मधेश दु्रतमार्ग सडक आयोजनाको भौतिक प्रगति ३२.८ प्रतिशत र वित्तिय प्रगति ८३.२८ प्रतिशत रहेको सचिव राईले उल्लेख गरे ।
उनले आर्थिक वर्ष २०७९\०८० मा थप ८२० किलोमिटर सडको कालोपत्रे र ६.५ किलोमिटर रेलमार्गको ट्र्याक निर्माण गर्ने कार्य सम्पन्न भएको जानकारी दिए । बैठकमा बोल्दै नेकपा (माओवादी केन्द्र)का प्रमुख सचेतक हितराज पाण्डेले भौतिक प्रगति कम भएका शिक्षा, स्वास्थ्य तथा यातायत आयोजनाको अनुगमन गर्न जानुपर्ने धारणा राखे । उनले सरकारले गरेको काम, प्रतिवेदनमा दिइएको विषय र भौतिक तथा वित्तिय प्रगतिको आधारमा समितिले अनुगमन गर्नुपर्ने बताए ।
राष्ट्रिय स्वतन्त्र पार्टीका सांसद सन्तोष परियारले आयोजनाहरु संघीयतासँग पनि जोडिएको उल्लेख गरे । उनले सरकारले चालु आर्थिक वर्ष समेत सकिन लागेको अवस्थामा गत आर्थिक वर्षको प्रतिवेदन पठाएको भन्दै आपत्ति समेत जनाए । सरकारले विवरण उपलब्ध गराउन ढिलाई गर्न नहुने उनको भनाइ छ । बैठकले केही दिनमा कर्णाली प्रदेशका शिक्षा, स्वास्थ्य तथा यातायातका योजनाहरुको स्थलगत अनुगमन गर्ने तयारी समेत गरेको छ ।
प्रतिक्रिया दिनुहोस्