यसै हप्ताको बुधबार दिउँसो सञ्चार माध्यमहरूमा एकाएक खबर आयो, काठमाडौँको टोखाबाट बरामद भएको २५ करोड रुपैयाँको बराबरको डलर र युरोका वास्तविक मालिक फेला परे ।
राजस्व अनुसन्धान विभाग स्रोत तथा केहीले प्रहरी स्रोतलाई उद्धृत गर्दै उक्त रकमका मालिक सिन्धुपाल्चोकका नारायण पौडेल भएको लेखे ।
अपरान्ह विभागकी प्रवक्ता कृष्णकुमारी श्रेष्ठले एउटा अनलाइनको समाचार आफ्नो फेसबुकमा सेयर गरिन् ।
समाचारमा पनि विभाग स्रोतलाई उद्धृत गर्दै २५ करोडको मालिक फेला परेको भनिएको थियो । केही बेरमा सो समाचार अपडेट भयो र विभागका महानिर्देशक चण्डीप्रसाद घिमिरेले बताएको भनियो ।
यसअघि राजस्व चुहावटका मुद्दाहरूमा अदालतमा मुद्दा दायर भएपछि मात्रै प्रेस विज्ञप्ति जारी गरेर जानकारी सार्वजनिक गर्ने गरेको थियो ।
२५ करोड रुपैयाँबराबरको विदेशी मुद्रा बरामद भएको मुद्दामा भने पत्रकारलाई बोलाएर समाचार चुहाइयो ।
अझ विभागकी प्रवक्ताले यस विषयमा औपचारिक रुपमा विज्ञप्ती नै जारी गर्नुपर्ने हो तर उनले एउटा अनलाइनमा प्रकाशित समाचार शेयर गरिन्, त्यो पनि विभागको अमूक स्रोतलाई उद्धृत गरिएको ।
अझ अनौठो कुरा त विभागले यो मुद्दाको विस्तृत अनुसन्धान नै सम्पन्न गरिसकेको छैन ।
विस्तृत अनुसन्धान प्रतिवेदन तयार गरिसकेपछि त्यसबाट निकालिएको निष्कर्षका आधारमा मुद्दा चलाउने नचलाउने वा थप अनुसन्धान गर्नुपर्ने नपर्ने भन्ने निर्णयका लागि सरकारी वकिल कार्यालयमा पठाउनुपर्छ ।
सरकारी वकिलले निर्णय दिएपछि मात्रै मुद्दाको अनुसन्धान पूर्ण भएको मानिन्छ र बल्ल अभियोगपत्र तयार गरी अदालतमा मुद्दा दायर गरिन्छ ।
यस्तो कानुनी व्यवस्था हुँदाहुँदै राजस्व अनुसन्धान विभागले विस्तृत अनुसन्धान प्रतिवेदन नै तयार नपार्दै किन कुनै अमूक व्यक्ति उक्त २५ करोडका मालिक हुन् भन्ने सूचना सार्वजनिक गर्यो त ? अनुसन्धान नै पूरा नहुँदै अभियुक्तको नाम सार्वजनिक गर्नुको रहस्य के हो ? भन्ने प्रश्न उठेको छ ।
विभागका महानिर्देशक घिमिरेले मिडियासँग रकम बरामद भएको ट्रकमा पैसा हालेको भिडियो नै प्राप्त भएको दाबी गरेका छन् ।
ट्रकमा पैसा हालिएको भनिएको ठाउँ टोखा नगरपालिकाको वडा नं ६ स्थित धापासी हाइटमा पर्छ । त्यस क्षेत्रमा सिसिटिभी क्यामेरा नै नभएको टोखा नगरपालिका तथा प्रहरीको विश्वस्त स्रोतको दाबी छ ।
टोखा नगरपालिकाको वडा नं ७ ले सडकहरूमा राखेका सिसिटिभी क्यामेरामा पनि ट्रकमा पैसा राखेको कुनै प्रमाण नभेटिएको स्रोत दाबी गर्छ ।
उक्त रकमका मालिक भनिएका नारायण पौडेलको टोखा १० खरीबोटस्थित घरमा बुधबार नै विभागको टोलीले स्थानीय बासिन्दा तथा स्थानीय जनप्रतिनिधिको रोहबरमा छापा मारेको थियो ।
छापाका क्रममा पौडेलको घरबाट प्रमाण लाग्ने खालका कुनै पनि सबुत फेला परेको छैन । पक्राउ परेका ड्राइभरले समेत २५ करोड रुपैयाँको मालिक नारायण पौडेल नै हुन् भनेर किटान गरेर बयानमा भन्न सकेका अनुसन्धान अधिकारीहरूले बताए ।
ड्राइभरसँगको फोन सम्पर्क र विगतमा उनको पृष्ठभूमिको आधारमा विभागले आशङ्का तथा ठहर गरेर नाम सार्वजनिक गरेको हुन सक्ने अनुसन्धान अधिकृतहरूको आशङ्का छ ।
यद्यपी यसको अनुसन्धान अझै जारी छ र प्रमाण भेटिन सक्छ तर अनुसन्धान पूरा नहुँदै रकमको मालिक भनेर विभागले नाम सार्वजनिक गरेपछि राजस्व अनुसन्धान विभागले ‘मिडिया ट्रयायल’ गरेको आरोप लागेकोे छ ।
प्रहरीले अनुसन्धान प्रक्रियामा सहयोग नगरेको भन्दै विभागले नाम चुहाएको हुनसक्ने एकथरीकाे आशङ्का छ । याे विषयमा प्रहरी र विभागकाे ‘टुयुनिङ’ नमिलेकाे समाचारहरू बाहिरिएकाले पनि यसमा बल पुगेकाे छ ।
जानकारहरूका अनुसार यो विषय सङ्गठित अपराधसँग जोडिने विषय भए पनि अनुसन्धानमा खटिएका अनुसन्धान अधिकृतहरू भने विदेशी विनिमयमा मात्रै मुद्दा चलाउने गरी मुद्दालाई हलुका बनाउने गरी लागेको हाे कि भन्ने संशय पैदा गरेकाे छ ।
२५ करोड रूपैयाँ बराबरकाे भेपमा चुपचाप
राजस्व अनुसन्धान विभागले ललितपुरको महालक्ष्मी नगरपालिका सितलहाइटबाट बरामद गरेको झण्डै २५ करोड रुपैयाँ बराबरको विद्युतीय चुरोट (भेप) सिल्क ग्रुपको सामान राख्ने गोदामबाट बरामद गरेको थियो ।
विभागले गत पुस २१ गते पक्राउ गरेका सर्लाही बलारा नगरपालिका भागवतनाथ चौधरीको सूचना पछ्याउँदै जाँदा ठुलो परिमाणमा भेप बरामद भएको थियो ।
भन्सार चोरी पैठारीका भेप समेतका मालवस्तु ओसारपसार गर्ने सूचना पाएपछि विभागले चौधरीलाई पक्राउ गरेको थियो ।
पक्राउ परेका चौधरीले दिएको सूचनाको आधारमा विभागले ललितपुरको महालक्ष्मी नगरपालिका सितलहाइटमा रहेको आरएम ट्रेड एन्ड सप्लायर्सको गोदाममा चोरी पैठारी गरेर लुकाएको ८६ हजार ४ सय थान भेप बरामद गरेको थियो ।
विभागले भेपसँगै आरएम ट्रेड एन्ड सप्लायर्सकाका सञ्चालक कञ्चनपुरका महेशप्रसाद पाठक र सोही गोदममा मालबस्तु राख्ने सिल्क ग्रुपका ट्रान्सपोर्ट म्यानेजर सिन्धुपाल्चोकका सन्तोष पराजुलीलाई पक्राउ गरेको थियो ।
पक्राउपछि बयानका क्रममा दुबै जनाले भेप सिल्क ग्रुपका प्रबन्ध निर्देशक रमेश शेर्पाको खुलाएको विभागको आन्तरिक प्रतिवेदनमा छ । शेर्पाको भेप भएको पक्राउ परेका व्यक्तिले खुलाएपछि सिल्क ग्रुपको शाखा कार्यालय बालकुमारी, ललितपुरमा विभागले सिल गरेको थियो ।
पक्राउ परेका सिल्क ग्रुपका ट्रान्सपोर्ट म्यानेजरले नै ठुलो परिमाणको भेप सिल्क ग्रुपका प्रबन्ध निर्देशक रमेश शेर्पाको रहेको स्वीकार गरेका छन् ।
कार्यालय सिल गरेर शेर्पालाई विभागमा उपस्थित हुन सूचना जारी गरे पनि उनी हालसम्म फरार रहेको छन् ।
पक्राउ परेका दुबै जनालाई भने विभागले धरौटीमा छोडेर तारेखमा राखेको छ तर यति ठुलो रकमबराबरको भेपबारे भने विभागले कतै सार्वजनिक जानकारी गराएको छैन तर २५ करोड रुपैयाँ नगदबारे भने अनुसन्धान नहुँदै मालिक भेटिएको भनेर प्रचार गर्दै बिचमै बहकिएकाे छ ।
प्रतिक्रिया दिनुहोस्