काठमडाैँ । निर्माण व्यवसायीहरूको अन्तर्राष्ट्रिय संगठन (इफाप्का) को ४७ औं सम्मेलनमा सहभागी हुन नेपाली प्रतिनिधि मण्डल सिंगापुर प्रस्थान गरेको छ ।
इफाप्काको ४७ औं सम्मेलन चैत्र २५ गतेदेखि सिंगापुरमा हुँदैछ । यसअघि नेपालले २६ औं सम्मेलन सम्पन्न गर्दै सिंगापुरलाई अध्यक्षता हस्तान्तरण गरेको थियो । ४७ औं सम्मेलन भने सिंगापुरको अध्यक्षतामा सञ्चालन हुँदैछ ।
सम्मेलन अप्रिल ७ देखि १२ सम्म हुनेछ । सम्मेलनमा सहभागी हुन सिंगापुर जाने क्रममा त्रिभूवन अन्तर्राष्ट्रिय विमानस्थलमा सञ्चारकर्मीहरूसँग कुरा गर्दै नेपाल निर्माण व्यवसायी महासंघका अध्यक्ष रवि सिंहले इफाप्काको ४७ औं सम्मेलनमा नेपालको प्रतिनिधित्व गर्दै आफूहरू सहभागी हुन लागेको बताए ।
उनले इफाप्काको सम्मेलनसँगै मलेसियाको क्वालालम्पुरमा इफाप्काको केन्द्रिय समितिको बैठक पनि बस्ने जानकारी दिए । यस पटकको इफाप्का सम्मेलनमा भाइचारा सम्बन्ध बिस्तारका साथै निर्माण प्रविधिको बारेमा सूचना आदानप्रदान हुने बताए । इफाप्कामा सहभागी मुलुकले आफूलाई कसरी कार्यगत रुपमा एक ठाउँमा उभ्याउने ? भन्ने बारेमा पनि छलफल हुने बताए ।
उनले सिंगापुर र नेपाल कार्यगत रूपमा सहकार्यका साथ अगाडि बढिरहेको बताए । आगामी दिनमा पूर्वी एशियाका विकसित मुलुकसँग सहकार्य गरी नेपालको पूर्वाधार क्षेत्रलाई परिस्कृत गर्ने क्रममा अगाडि बढेको जानकारी दिए ।
प्रतिक्रिया दिनुहोस्