काठमाडाैँ । उद्योग, वाणिज्य तथा आपूर्तिमन्त्री दामोदर भण्डारीले व्यवसायीहरूले नेपालमै उत्पादित वस्तु निर्यात गरेर नाफा कमाउनुपर्ने बताएका छन् ।
शनिवार काठमाडौँमा नेपाल हिमालयन सीमापार वाणिज्य महासंघद्वारा आयोजित कार्यक्रममा बोल्दै उनले यस्तो बताएका हुन् । उनले विदेशबाट वस्तु आयात गरेर नाफा कमाउनेले नेपालमै कुनै न कुनै उद्योग कलकारखानामा लगानी गर्नुपर्ने बताए ।
नेपालमा उत्पादिन वस्तुको ब्राण्डिङ र लेवलिङ गरेर विश्व बजारमा निर्यात गरे मात्रै व्यवसायी र राज्य फस्टाउनसक्ने उनको भनाइ छ । उनले नेपाल छिमेकी ठूला दुई राष्ट्र चीन र भारतको बजार बनेको तर नेपालले वस्तु उत्पादन गरेर ब्राण्डिङ गर्न नसक्दा समस्या आएको बताए । उनले वस्तु आयातबाट भएको नाफाबाट राजधानीमा घर बनाएर सुखसयलमा बसेर मात्रै समृद्ध हुन नसक्ने बताए ।
मन्त्री भण्डारीले हिमालयपार व्यापारलाई समृद्ध बनाउन सरकार तयारी अवस्थामा रहेको बताए । व्यवसायीहरुको मागलाई सम्बोधन गरेर नीति तथा कार्यक्रममार्फत लागू गराउन आफूले उच्च प्राथमिकतामा राखेको उनको भनाइ छ । उनले आफ्ना माग सरकारसमक्ष पेश गर्न व्यवसायीहरुलाई आग्रह गरे ।
मन्त्री भण्डारीले नेपालमा उत्पादन भएका ५ हजार वस्तु चीनमा बिना भन्सार दरमा नेपालले निर्यात गर्न पाउने चीनसँग सम्झौता भएकाले नेपालमा उत्पादित वस्तु चीनमा निर्यात गर्न आग्रह गरे ।
प्रतिक्रिया दिनुहोस्