देश–मधेस विभाजनको राजनीति अन्त्य गर्ने सभापति लामिछानेको घोषणा

काठमाडाैँ । राष्ट्रिय स्वतन्त्र पार्टी (रास्वपा)का सभापति रवि लामिछानेले देश र मधेसलाई विभाजित गर्ने राजनीतिक प्रवृत्तिको अन्त्य गर्ने घोषणा गरेका छन् ।

बुधबार जानकी मन्दिर परिसरमा मन्दिर परिक्रमा पश्चात् कार्यकर्तालाई सम्बोधन गर्दै राष्ट्रिय स्वतन्त्र पार्टीका सभापति लामिछानेले विभेद र विभाजनको राजनीति अन्त्य गर्नु अहिलेको मुख्य आवश्यकता भएको बताएका हुन् ।

उनले अघिल्लो निर्वाचनमा सुशासनको मुद्दा सशक्त रूपमा उठाए पनि विभेदको विषयमा अपेक्षाकृत आवाज बुलन्द गर्न नसकेको स्वीकार गरे। “हामीले यसअघिको निर्वाचनमा सुशासनको कुरा गर्‍यौँ, तर विभेदविरुद्ध त्यति चर्को रूपमा बोल्न सकेनौँ,” उनले भने, “यसपटक विभेदको अन्त्यसँगै सुशासन स्थापना गर्ने स्पष्ट प्रतिबद्धतासहित आएका छौँ।”

लामिछानेले देश र मधेसबीच कृत्रिम दूरी सिर्जना गर्ने राजनीति अब स्वीकार्य नहुने उल्लेख गर्दै समान अधिकार, अवसर र सम्मान सुनिश्चित गर्ने दिशामा पार्टी अघि बढ्ने स्पष्ट पारे ।

उनले जनकपुरधामलाई प्रमुख पर्यटकीय केन्द्रका रूपमा विकास गर्ने कार्यक्रमसमेत अघि सारिने बताए । कार्यक्रममा धनुषा क्षेत्र नम्बर ३ का प्रतिनिधि सभा सदस्य उम्मेदवार मनिष झाको पनि उपस्थिति रहेको थियो।