काठमाडाैँ । जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार आज दिउँसो तराई भू–भागका केही स्थानमा बिहानको समयमा हुस्सु लाग्ने सम्भावना छ।
कोशी प्रदेशका पहाडी तथा हिमाली भू–भागसहित देशका अधिकांश हिमाली क्षेत्रमा सामान्यतया बादल लाग्नेछ। बाँकी पहाडी भू–भागमा आंशिक बदली रहनेछ भने तराई भू–भागमा मौसम मुख्यतया सफा रहने अनुमान गरिएको छ।
यसैबीच कोशी प्रदेशका पहाडी तथा हिमाली क्षेत्र, बागमती र गण्डकी प्रदेशका हिमाली भू–भागका थोरै स्थान तथा बाँकी प्रदेशका हिमाली भू–भागका एक–दुई स्थानमा मेघगर्जन र चट्याङसहित हल्का वर्षा वा हिमपातको सम्भावना रहेको छ। बागमती र गण्डकी प्रदेशका पहाडी भू–भागका एक–दुई स्थानमा पनि चट्याङसहित हल्का वर्षा हुन सक्ने विभागले जनाएको छ।
राति भने तराईका केही स्थानमा तुँवालो लाग्ने सम्भावना रहेको छ। हिमाली भू–भागमा सामान्य बदली रहनेछ भने कोशी, गण्डकी र कर्णाली प्रदेशका पहाडी भू–भागमा आंशिक बदली रहने अनुमान गरिएको छ। बाँकी भू–भागमा मौसम प्रायः सफा रहनेछ।
रातिको समयमा पनि कोशी, गण्डकी र कर्णाली प्रदेशका हिमाली भू–भागका एक–दुई स्थानमा मेघगर्जन र चट्याङसहित हल्का वर्षा वा हिमपात हुन सक्ने मौसम पूर्वानुमान महाशाखाले जानकारी दिएको छ।
प्रतिक्रिया दिनुहोस्