काठमाडौँ । प्रतिनिधि सभा सदस्य निर्वाचनअन्तर्गत भइरहेको मतदानसम्बन्धी अद्यावधिक विवरण आज साँझ सार्वजनिक गरिने भएको छ।
निर्वाचन आयोगका सहसचिव तथा प्रवक्ता नारायणप्रसाद भट्टराईका अनुसार आज बिहीबार साँझ ६ः१५ बजे आयोगमा पत्रकार सम्मेलन आयोजना गरी मतदानको अद्यावधिक अवस्था सार्वजनिक गरिनेछ।
जारी सूचनामा मतदानसम्बन्धी पछिल्लो विवरण पत्रकार सम्मेलनमार्फत जानकारी गराइने भएकाले सम्बन्धित सबैलाई जानकारीका लागि अनुरोध गरिएको छ।
आज बिहान ७ बजेदेखि देशभर सुरु भएको मतदान साँझ ५ बजेसम्म सञ्चालन हुनेछ। तर ५ बजेसम्म मतदान केन्द्रमा लाइनमा बसेका मतदाताले भने त्यसपछि पनि मतदान गर्न पाउने व्यवस्था गरिएको आयोगले जनाएको छ।
यसअघि दिउँसो आयोजित पत्रकार सम्मेलनमा आयोगले मतदाताहरू उत्साहजनक रूपमा मतदानमा सहभागी भइरहेको जनाएको थियो। छिटपुट घटनाबाहेक देशभर शान्तिपूर्ण रूपमा मतदान भइरहेको आयोगको भनाइ छ।
प्रतिक्रिया दिनुहोस्