काठमाडौँ । नेकपा एमालेकी सचिव पद्मा अर्यालले निर्वाचन परिणाम स्वीकार गर्दै अब पार्टी सशक्त प्रतिपक्षको भूमिकामा रहने बताएकी छन् ।
बिहीवार निर्वाचन आयोगले प्रतिनिधि सभाको समानुपातिकतर्फ निर्वाचित सांसदहरूलाई प्रमाणपत्र वितरण गरेपछि सञ्चारकर्मीहरूसँग कुरा गर्दै उहाँले यस्तो धारणा व्यक्त गरेकी हुन् । उनले आगामी सरकारको नेतृत्व गर्ने राष्ट्रिय स्वतन्त्र पार्टीलाई सकारात्मक कामका लागि सहयोग गर्ने बताउँदै एमालेले स्थायित्व र राष्ट्रिय हितलाई प्राथमिकतामा राख्ने स्पष्ट पारिन्।
सचिव अर्यालले निर्वाचन परिणामलाई स्वीकार गर्दै पार्टीले आफ्ना कमजोरीहरूको समीक्षा गर्ने उल्लेख गरिन् ।उनले मुलुकको विकास र समृद्धिका लागि राजनीतिक स्थिरता आवश्यक रहेको बताउँदै रोजगारी सिर्जना, उत्पादन वृद्धि, महिला तथा ज्येष्ठ नागरिकको सम्मानजस्ता विषयमा सरकार केन्द्रित हुनुपर्नेमा जोड दिइन्।
उनका अनुसार राजनीतिक अस्थिरता नै विकासको प्रमुख बाधक हो । नयाँ शक्तिले झण्डै दुई तिहाइ जनसमर्थन प्राप्त गरेको अवस्थामा सरकारप्रति जनअपेक्षा अझै उच्च रहेको पनि उनले बताइन् ।
सचिव अर्यालले एमालेले प्रतिपक्षबाट जनमतको रक्षा गर्दै सरकारलाई सही मार्गमा ल्याउन भूमिका खेल्ने बताउँदै राम्रो काममा सहयोग र जनहित तथा राष्ट्रहित विपरीत कार्यमा कडा खबरदारी गर्ने स्पष्ट पारिन् । उनले राष्ट्रिय स्वाभिमान कमजोर हुने कुनै पनि गतिविधि स्वीकार्य नहुने उल्लेख गर्दै आवश्यक परेमा कडा रूपमा प्रतिवाद गर्ने चेतावनीसमेत दिइन्।
उनले भनिन् “जनताले प्रकट गरेको मतप्रति हाम्रो सम्मान छ । निर्वाचन परिणामलाई स्वीकार गर्दै हामी राष्ट्रिय स्वतन्त्र पार्टीको सरकार राम्रोसँग चलोस् भन्ने चाहन्छौँ । हामी स्थायित्वका पक्षमा छौँ । हामी आफ्ना कमजोरीको समीक्षा गर्छौँ । प्रतिपक्षको भूमिकामा एमालेलाई तपाईंहरूले सशक्त देख्नुहुनेछ । राष्ट्रिय स्वाभिमान कमजोर हुने कुनै पनि काम हामी स्वीकार गर्न सक्दैनौँ । बेरोजगारी समस्या समाधान, उत्पादन वृद्धि, आत्मनिर्भरता र विकास हाम्रो प्राथमिकता हो । राम्रो काममा सहयोग र गलत काममा खबरदारी गर्छौँ ।”
उनले एमालेले निर्वाचन परिणामको गहिरो समीक्षा गर्दै संगठनात्मक कमजोरी सुधार गर्ने पनि बताइन् ।
प्रतिक्रिया दिनुहोस्