३५ लाख ग्राहकलाई सेवा दिनसक्नेगरी होटलहरूको क्षमता विकास भइसक्यो, पर्यटकको खाँचो छः अध्यक्ष शाह

काठमाडाैँ । नेपाल होटल संघ (हान) का अध्यक्ष विनायक शाहलले देशभर ३५ लाख ग्राहकलाई सेवा दिनसक्नेगरी होटलहरूको क्षमता विकास भइसकेको बताएका छन् ।

शुक्रवार ‘२० औं फेवा नववर्ष महोत्सव’ घोषणा कार्यक्रममा बोल्दै उनले पर्यटकहरूको सुविधाका लागि गुणस्तीय होटलहरू निर्माण भइसकेको र त्यसमा पनि पोखराको भुमिका धेरै रहेको बताएका हुन् । उनले मुलुकमा अब आन्तरिक तथा वाह्य पर्यटकहरुको खाँचो रहेको समेत बताए । मुलुकमा लगानीको वातावरण रहेको र पर्यटन क्षेत्रले मुलुकको विकासमा टेवा पु¥याउने भनेपनि खोजेजस्तो परिणाम पाउन नसकेको उनको भनाइ छ । फेवा महोत्सवले स्वदेशी तथा विदेशी पर्यटकहरू भित्र्याउन सहयोग पुर्याउने उनको विश्वास छ ।

उनले पछिल्लो दिनहरुमा भइरहेका नाराजुलुसहरूको कारण नेपाल आउने पर्यटकहरु प्रभावित भएको बताए । २० औँ फेवा नववर्ष महोत्सव चैत ३० गतेदेखि पोखराको फेवाताल किनारमा हुने भएको छ । क्षेत्रीय होटल संघ पोखराको आयोजनामा हुने महोत्सव बैशाख १ गतेसम्म हुनेछ । महोत्सव अवधिभर होटलको सेवामा २० प्रतिशत छुट दिने आयोजकले जनाएको छ । महोत्सवले नेपालको पर्यटन प्रवद्र्धन गर्न सहयोग पुग्ने समेत आयोजकको विश्वास छ ।