काठमाडौँ । अमेरिकी पूर्व राष्ट्रपति डोनाल्ड ट्रम्पले मंगलबार ‘गोल्डेन डोम’ नामक एक महत्वाकांक्षी मिसाइल प्रतिरक्षा प्रणालीको घोषणा गरेका छन् ।
जसको अनुमानित लागत १७५ अर्ब अमेरिकी डलर रहेको छ। ट्रम्पले यस परियोजनालाई ऐतिहासिक ‘म्यानहट्टन परियोजना’सँग तुलना गर्दै यसलाई अमेरिकाको सुरक्षाको क्षेत्रमा नयाँ युगको सुरुआतको रूपमा वर्णन गरे ।
ओभल अफिसमा आयोजित घोषणाका क्रममा अमेरिकी रक्षा सचिव पिट हेगसेथ र अमेरिकी अन्तरिक्ष बलका जनरल माइकल गुएटलिनसँगै ट्रम्पले उक्त प्रणालीको नेतृत्व गुएटलिनले गर्ने जानकारी दिए। गुएटलिनलाई यस परियोजनाको प्रमुख नियुक्त गरिएको हो। ट्रम्पले उक्त परियोजना तीन वर्षभित्र सम्पन्न हुने र यसले क्यानडासहित सम्पूर्ण महाद्वीपीय अमेरिकालाई हवाई खतराबाट सुरक्षा दिने दाबी गरे ।
‘गोल्डेन डोम’ प्रणाली विशेष रूपमा अन्तरिक्षमा रहेका उपग्रहहरूको नेटवर्कमार्फत विश्वका कुनै पनि कुनाबाट प्रहार गरिएका मिसाइलहरूलाई पहिचान गर्न, ट्र्याक गर्न र अवरोध गर्न सक्षम हुने दाबी गरिएको छ। ट्रम्पले यो प्रणाली अन्तरिक्षमार्फत प्रहार गरिएका क्षेप्यास्त्रहरूलाई समेत रोक्न सक्षम हुने बताएका छन्।
यस परियोजनाको प्रारम्भिक अवधारणा ट्रम्प प्रशासनको पहिलो हप्तामा ‘अमेरिकाको लागि आइरन डोम’ भनेर सार्वजनिक गरिएको थियो। पछिल्लो समय यसलाई इजरायलको अवस्थित आइरन डोम प्रणालीसँग ट्रेडमार्क जटिलताका कारण ‘गोल्डेन डोम’ नाम दिइएको बताइएको छ।
गुएटलिन यसअघि अमेरिकी अन्तरिक्ष बलमा उपप्रमुखको रूपमा कार्यरत थिए र उनी मिसाइल रक्षा तथा अन्तरिक्ष क्षमताको क्षेत्रमा अनुभवी अधिकारी मानिन्छन्।
ट्रम्पद्वारा घोषणा गरिएको १७५ अर्ब डलरको लागत अमेरिकी काँग्रेसनल बजेट अफिसको पूर्वानुमानभन्दा निकै कम हो। यसअघि उक्त कार्यालयले यस्ता प्रणालीको लागत २० वर्षमा १६१ अर्बदेखि ५४२ अर्ब डलरसम्म पुग्न सक्ने अनुमान गरेको थियो। त्यस्तै, २०१२ को राष्ट्रिय अनुसन्धान परिषद्को अध्ययनले त अन्तरिक्ष–आधारित बूस्ट–फेज मिसाइल रक्षा प्रणालीको लागत ८३१ अर्ब डलरसम्म हुन सक्ने प्रक्षेपण गरेको थियो।
प्रतिक्रिया दिनुहोस्