प्रतिनिधिसभाको बैठक आज दिउँसो १ बजे बस्ने, बजेटमाथि छलफलको सम्भावना

काठमाडौँ । सङ्घीय संसद्अन्तर्गत प्रतिनिधिसभाको बैठक आज दिउँसो १ः०० बजे बस्ने गरी समय तय गरिएको छ । बैठकमा उपप्रधानमन्त्री तथा अर्थमन्त्री विष्णुप्रसाद पौडेलले ‘आर्थिक वर्ष २०८२/८३ को राजस्व र व्ययको वार्षिक अनुमानमाथि सामान्य छलफल गरियोस्’ भन्ने प्रस्ताव पेश गर्ने सम्भावित कार्यसूची रहेको छ । सो प्रस्तावमाथि सांसदहरूले धारणा राख्ने कार्यक्रम रहेको संसद् सचिवालयले जनाएको छ ।

यसै बैठकमा राज्य व्यवस्था तथा सुशासन समितिका सभापति रामहरि खतिवडाले ‘सङ्घीय निजामती सेवा विधेयकसम्बन्धी समितिको प्रतिवेदन, २०८२’ पेस गर्नुहुनेछ ।

तर, पछिल्ला केही दिनदेखि संसद् बैठक निरन्तर अवरोध हुँदै आएको छ । प्रमुख प्रतिपक्षी नेपाली कांग्रेससहित विपक्षी दलहरूले ‘भिजिट भिसा’ प्रकरणमा भएको अनियमितताका लागि गृहमन्त्री रमेश लेखकको राजीनामा माग गर्दै बैठक अवरुद्ध गरिरहेका छन् ।

निरन्तर अवरोधका कारण संसद् नियमित कार्यसूचीमा प्रवेश गर्न नसकेको अवस्था रहेको छ। आजको बैठकले अवरोधको गतिरोध तोड्ने वा त्यसैको दोहोरिने हो भन्नेमा आम चासो बढेको छ ।