काठमाडौँ । नेपालले भैँसीको मासु, दुग्ध पदार्थ, तरकारी, फलफूल र जडीबुटी चीन निर्यातका लागि भन्सार प्रशासनमा सहजीकरण र लचकता अपनाउन आग्रह गरेको छ ।
चीनको भन्सार प्रशासन र कृषि तथा पशुपन्छी मन्त्रालयका उच्च अधिकारीबिच बिहीबार काठमाडौँमा सम्पन्न द्विपक्षीय बैठकमा नेपालले राखेको यो प्रस्तावलाई चीनले सकारात्मक रूपमा लिएको जनाएको छ ।
बैठकमा नेपालको नेतृत्व कृषि तथा पशुपन्छी विकास मन्त्री रामनाथ अधिकारीले गरे भने चीनको भन्सार प्रशासनका उपमन्त्री वाङ लिङजुनले चीन पक्षको नेतृत्व गरे। नेपालले थर्मल विधिबाट प्रशोधित भैँसीको मासु र कार्टिलेज (कुरकुरे हाड) सहित घिउ, नौनी, वटर तथा छुर्पी चीन निर्यातका लागि जोड दिएको छ । यस्तै हेलेज र साइलेजजस्ता पशु आहार, कुखुराको मासु र पञ्जा, तरकारी, सुन्तलाजन्य फलफूल, चिया, कफी तथा जडीबुटी निर्यातका लागि पनि सहजीकरण गर्न आग्रह गरिएको छ ।
हाल नेपालबाट ३४ प्रकारका कृषि वस्तु ६१ कम्पनीमार्फत चीन निर्यात भइरहेको छ भने हरियो घाँस ५ कम्पनीमार्फत निर्यात हुँदै आएको छ । साइलेज निर्यातका लागि पनि नेपालले चीनसँग प्रस्ताव गरेको छ ।
बैठकमा उपमन्त्री वाङले चीनले नेपालबाट कृषि वस्तु निर्यातलाई उच्च प्राथमिकता दिएको उल्लेख गर्दै भने, “एक सयभन्दा बढी मुलुकले यस्ता प्रस्ताव गर्ने गरेका छन्, तर छिमेकी मुलुकका रूपमा हामीले नेपाललाई विशेष महत्व दिँदै प्रयास अघि बढाएका छौं । व्यापार सहजीकरणका लागि दुवै देशको संयुक्त प्रयास आवश्यक हुन्छ, हामी त्यसका लागि तयार छौं ।”
कृषि मन्त्री अधिकारीले मासु निर्यातका लागि खोरेत मुक्त क्षेत्र घोषणा गर्ने प्रक्रिया अघि बढाइरहेको र चीनको क्वारेन्टाइन मापदण्ड पूरा गर्ने प्रयास भइरहेको जानकारी दिए। साथै, सुन्तलाजन्य फलफूल निर्यातका केही सर्तमा लचकता अपनाइदिन आग्रह गरेका थिए ।
बैठकमा नेपालले कृषि उपज निर्यात सहज बनाउन दुवै मुलुकको संयुक्त संरचना स्थापना गर्ने प्रस्ताव राखेको र चीनले यसमा सहमति जनाएको जनाएको छ । बैठकमा नेपालतर्फबाट सचिव डा.गोविन्द प्रसाद शर्मा, डा.दीपक कुमार खराल, सहसचिवलगायत सहभागी थियाे भने चीनतर्फ भन्सार प्रशासनका उच्च अधिकारीहरू सहभागी भएका थिए ।
प्रतिक्रिया दिनुहोस्