दुग्ध विकास संस्थानले २ अर्ब ४ करोड रुपैयाँ भुक्तानी गरिसकेको प्रधानमन्त्रीकाे दाबी

काठमाडौँ । दुग्ध किसानहरूको बक्यौता भुक्तानीका विषयमा दुग्ध विकास संस्थानले हालसम्म २ अर्ब ४ करोड रुपैयाँ भुक्तानी गरिसकेको प्रधानमन्त्री केपी शर्मा ओलीकाे दाबी छ। उनले आज प्रतिनिधिसभाको बैठकमा सांसदहरूको प्रश्नको जवाफ दिने क्रममा सो जानकारी दिएका हुन्।

उनका अनुसार, संस्थानलाई दूध बिक्री गर्ने सबै कृषकहरूको भाद्र मसान्तसम्मको बाँकी रकम भुक्तानी भइसकेको छ भने अझै बाँकी रहेको रकम क्रमशः भुक्तानी प्रक्रियामा रहेको छ। साथै, केही निजी डेरी उद्योगहरूले कृषकहरूलाई भुक्तानी गर्न बाँकी रहेको रकम यथाशिघ्र प्रदान गर्न निर्देशन दिइएको बताएका छन्।

यसैगरी, उखु किसानले आफ्नो उत्पादनको उचित मूल्य पाउन सकून् भन्ने उद्देश्यले सरकारले उखु क्रसिङ्ग हुनुअघि नै खरिद मूल्य तोक्दै आएको छ। चालु आर्थिक वर्षका लागि सरकारले मंसिर महिनामै प्रति क्विन्टल रु. ५८५ तोकेको छ। उखु मिलहरूले निर्धारण गरिएको मूल्यमा कृषकहरूबाट उखु खरिद गरी तुरुन्त भुक्तानी दिनुपर्ने सरकारको निर्देशन छ। गत वर्ष उत्पादन भएका उखुको खरिद मूल्यका साथै सरकारले प्रति क्विन्टल रु.७० का दरले १ अर्ब ४४ करोड ९२ लाख रुपैयाँ अनुदान प्रवाह गरिसकेको छ।

प्रधानमन्त्री ओलीले उपभोक्ताहरूलाई महँगीको मारबाट जोगाउन सरकारले नियमित बजार अनुगमनलाई तीव्र बनाएको पनि स्पष्ट पारे। विशेष गरी चाडपर्वको समयमा खाद्य व्यवस्था तथा व्यापार कम्पनी लिमिटेड र साल्ट ट्रेडिङ लिमिटेडमार्फत सुपथ मूल्य पसलहरू सञ्चालन गर्ने सरकारको नीति रहेको उनले उल्लेख गरे।