एन आई सी एशियामाथि सामाजिक सुरक्षा भत्ताको रकम अन्तै प्रयोग गरेको आरोप,३ महिनादेखि भुक्तानी गरेन

काठमाडौँ । एन आई सी एशिया बैंकले चारमहिनादेखि सामाजिक सुरक्षा भत्ता नदिएको पाइएको छ ।

रौतहटको गुजरा नगरपालिकामा रहेको एन आई सी एशिया बैंकको शाखामा नगरपालिकाले ४ महिना अगाडी लाभग्राहीहरूलाई सामाजिक सुरक्षा भत्ता वितरण गर्नको लागि भन्दै ६ करोड रुपैयाँ बैंकमा पठाएको थियो ।

पालिकाका प्रवक्ता रामजीत चौधरीले गत मङ्सिर ११ गते पालिकाले ६ करोड रुपैयाँ बैंकमा पठाएको बताउँछन् ।

चौधरीले सामाजिक सुरक्षा भत्ता वितरण गर्नको लागि भनेर ६ करोड रुपैयाँ पठाएको तर अहिलेसम्म पनि वितरण नभएको बताए । बैंकले ८ हजार लाभग्राहीको सामाजिक सुरक्षा भत्ता वितरण नगरेको पालिकाकाे आराेप छ ।

पालिकाले पटक पटक भत्ता किन वितरण नगरेको भनेर सोधेको थियो ।

उनले भने, “विभिन्न कारणले गुजरा नगरपालिकाका सेवाग्राहीहरूको खाता फ्रिज रहेकोले ग्राहक पहिचान (केवाइसी) नभएसम्म भत्ताको पैसा रोक्ने धारणा थियो । हामीले केन्द्रीय कार्यालयबाट मान्छे बोलाउनुस् भनको थियौं । हामी तल्लो तहको कर्मचारी हो हामीलाई भनेर हुँदैन भन्यो ।”

३/३ महिनामा नगरपालिकाले पैसा पठाए पनि बैंकले विभिन्न बाहानामा पैसा रोकेको आरोप प्रवक्ता चौधरीको छ ।

चौधरीले भने, “सामाजिक सुरक्षा भत्ता वापतको पैसा अन्य खर्च गरेर हामीलाई आँखोमा छारो हाल्न खोजेको हो ? भनेको थियौं । हिजो केन्द्रीय कार्यालयबाट कर्मचारी आएर भत्ता बाँड्ने कुरा भएको छ ।”

बैंकका शाखा प्रबन्धक सद्दाम प्रवेजले रि केवाईसी नभएका कारण भत्ता वितरण गर्न नसकेको दाबी गरे ।

उनले भने, “हामीले पटक पटक नगरपालिका, वडालाई रि केवाईसी भर्न भनेपनि त्यो नभएका कारण रोकिएको हो । सबैलाई एकमुष्टरुपमा पठाउने भएपछि केवाइसी भएकाहरूलाई पनि नपठाएको हो । हिजो नगरपालिकामा छलफल भइसकेको छ । त्यहि अनुसार हामी गर्छौँ ।”

छलफलपछि तत्कालका लागि विपन्न वर्गलाई वितरण गर्ने सहमति बनेको उनको भनाई छ । पालिका भने बैँकको शैलीबाट सशंकित बनेको छ । प्रवक्ता चौधरीले पालिकाबाट सामाजिक सुरक्षाका लागि पठाएकाे रकम अन्तै प्रयाेग गरेकाे आशंका व्यक्त गरेका छन् ।