संयम हुन आग्रह गर्दै शान्तिको कामना गरेपछि भारत र पाकिस्तानबिचको लडाईं रोकियोः प्रधानमन्त्री ओली

काठमाडाैँ । प्रधानमन्त्री केपी शर्मा ओलीले आफूहरूले संयम हुन आग्रह गर्दै हात हालाहालको स्थिति लडाईंमा परिणत नहोस् भनेर कामना गरेपछि भारत र पाकिस्तानबिचको लडाईं रोकिएको बताएका छन् ।

सोमवार २५६९ औँ बुद्ध जयन्ती तथा लुम्बिनी दिवस –२०८२ को अवसरमा लुम्बिनीमा आयोजित कार्यक्रमलाई सम्बोधन गर्दै उनले केही दिनअघि मात्रै छिमेकी मुलुक भारत र पाकिस्तानबिच युद्धको स्थिति सिर्जना भएपनि त्यो अघि बढ्न नपाएको बताएका हुन् ।

उनले लडाईं अगाडी नबढोस् भनेर कामना गरेको बताए । उनले भारत र पाकिस्तानले लडाईंमा जान नदिने प्रतिवद्धता व्यक्त गरेको बताउँदै उहाँले संयमताका लागि दुवै मुलुकलाई धन्यवाद दिए । उनले फेरि पनि दुवै देशबिच केही आरोप/प्रत्यारोपको स्थिति जारी रहेको जिकिर गरे ।

प्रधानमन्त्री ओलीले बुद्धका शान्तिका सन्देशहरूको अर्थ अहिले पनि र जहाँ पनि रहेको बताए । उनले व्यक्तिको आफ्नो मनस्थिति, पारिवारिक र सबै कुराको लागि शान्तिको महत्व रहेको धारणा राखे ।