७३ इन्टरनेट सेवा प्रदायकले तिरेनन् रोयल्टी र आरटीडीएफ शुल्क, दूरसञ्चार प्राधिकरणको १५ दिने ताकेता

काठमाडौँ । दूरसञ्चार सेवा प्रदान गर्दै आएका ७३ वटा इन्टरनेट सेवा प्रदायक कम्पनीहरुले विगत केहि वर्षदेखि नेपाल सरकार र दूरसञ्चार प्राधिकरणमा बुझाउनु पर्ने रोयल्टी तथा ग्रामीण दूरसञ्चार विकास कोष रकम (आरटीडीएफ) नियमानुसार दाखिला नगरेको पाइएको छ।

नेपाल दूरसञ्चार प्राधिकरणले बुधबार एक सूचना प्रकाशित गर्दै नियामक नेपाल दूरसञ्चार प्राधिकरणले राज्यलाई तिर्नुपर्ने राजस्व नतिर्ने सेवा प्रदायकको सूची सार्वजनिक गरेको छ ।उक्त सूचना अनुसार, इन्टरनेट (ईमेल) तथा नेटवर्क सेवाको लागि अनुमति प्राप्त गरेका ती सेवा प्रदायकहरुले लेखा परीक्षण विवरण समेत बुझाएका छैनन्।

प्राधिकरणका अनुसार पटक–पटक पत्राचार, इमेल तथा सार्वजनिक सूचनामार्फत जानकारी दिँदासमेत ती कम्पनीहरुले विवरणसहितको बाँकी बक्यौता रकम दाखिला नगरेको हुँदा अबको १५ दिनभित्र सम्पूर्ण विवरण र बक्यौता रकम बुझाउनुपर्ने अन्तिम सूचना दिइएको हो।

“निर्धारित समयावधिमा विवरण तथा बक्यौता रकम दाखिला नगरेमा दूरसञ्चार ऐन, २०५३ अनुसार आवश्यक कानुनी कारवाही अघि बढाइनेछ,”सूचनामा भनिएको छ ।

प्राधिकरणको सूचीमा क्लासिक टेक, डिश मिडिया नेटवर्क, मर्सन्टाइल कम्युनिकेशन, वेब सर्फर नेपाल, एरोनेट, अलिशा कम्युनिकेशन लगायत साना–ठूला गरी ७३ वटा कम्पनीहरू रहेका छन्।