धनुषामा आगजनी, तोडफोड र लुटपाटमा संलग्न ६ जना पक्राउ

काठमाडाैँ । जेनजी आन्दोलनको क्रममा जनकपुरधामको विभिन्न स्थानमा आगजनी, तोडफोडका साथै लुटपाटमा संलग्न रहेकाहरूलाई धनुषा प्रहरीले पक्राउ गरी कानूनी प्रक्रिया अगाडी बढाउने भएको छ ।

जेनजी आन्दोलनको क्रममा भदौ २४ गते धनुषाको विभिन्न स्थानमा तोडफोड तथा आगजनीमा संलग्नहरूलाई पक्राउ गर्न सुरू गरेको हो । जिल्ला प्रहरी कार्यालय धनुषाले आन्दोलनको नाममा फरकफरक स्थानमा सरकारी सम्पति लुटपाटका साथै तोडफोड र आगजनीमा संलग्न रहेकाहरूमध्ये ६ जनालाई नियन्त्रणमा लिएको जिल्ला प्रहरी कार्यालय धनुषाका प्रहरी उपरीक्षक नरहरी रेग्मीले जानकारी दिए।

उनकाअनुसार मधेस लोकसेवा आयोगको कार्यालयमा तोडफोडका साथै हतियार लुटपाटमा संलग्न रहेको आरोपमा दुई जनालाई पक्राउ गरिएको छ । पक्राउ पर्नेमा शहीदनगर नगरपालिका ३ का शिवम साह र जनकपुरधाम १३ का काले पटेल रहेका छन् । 

त्यस्तै बलवा प्रहरी चौकीमा तोडफोड तथा आगजनीमा संलग्न रहेको आरोपमा निरज मिश्र र कृष्ण यादवलाई पक्राउ गरिएको प्रहरी उपरीक्षक रेग्मीले बताए ।