जनजीवन सामान्य बनेसँगै बजारमा चहलपहल बढ्दै

काठमाडाैँ । अन्तरिम सरकार गठनसँगै काठमाडौँ उपत्यकाको जनजीवन सामान्य बनेको छ ।

काठमाडौँ उपत्यकाका विभिन्न स्थानमा आम नागरिकहरू आवश्यक सामान किन्न, कार्यालय जान सुरू गरेका छन् । अन्तरिम सरकारको प्रधानमन्त्री सुशीला कार्की बनेकी छन् ।

मन्त्रीपपरिषद् विस्तार हुन अझै सकेको छ । सोमबार मन्त्रीपरिषद् विस्तार गर्ने तयारी छ । सोमबार अर्थमन्त्रीमा रामेश्वर खनाल, उर्जामन्त्रीमा कुलमान घिसिङ र गृहमन्त्रीमा ओमप्रकाश अर्यालको शपथ ग्रहण हुने बताइएको छ ।

यद्यपि जेन जी समूहका अगुवा सुदन गुरुङ समूहले प्रधानमन्त्री सुशीला कार्कीले जेन जीसँग वार्ता नै नगरी मन्त्रीपरिषद् विस्तार गरेकाे भन्दै प्रधानमन्त्री कार्कीको राजीनामा माग गर्दै आइतवार राति बालुवाटारमा प्रदर्शन गरेका थिए ।

जेन जी समूहले सरकारले आफूहरुका माग पूरा नगरे पुनः सरकार ढाल्ने र सडकमा आन्दोलन जारी राख्ने चेतावनी दिएका छन् । यद्यपि चाडवाडको समय रहेकाले उपत्यकामा चहल पहल बढेको छ । अब गाउँ फर्किने चटारो पनि सुरू भएको छ । जसकारण पनि सामानहरू किन्न आम नागरिकहरूको उपस्थिति बजारमा उल्लेख्य छ ।