काठमाडाैँ । नेपाली कम्युनिष्ट पार्टी (नेकपा)का प्रमुख सचेतक युवराज दुलालले सरकारले बजेट अधिवेशन बोलाउनुपर्ने समयमा पाँचवटा अध्यादेश सिफारिस गरेर झन्डै दुई तिहाई जनमतको अपमान गरेको आरोप लगाएकाे छ।
बुधबार विपक्षी दलहरूको बैठकपछि सञ्चारकर्मीसँग कुरा गर्दै दुलालले संसदमार्फत एक हप्तादेखि १० दिनभित्रै विधेयक पारित गर्नसक्ने बहुमत हुँदाहुँदै अध्यादेशमार्फत शासन गर्न खोज्नु असंवैधानिक भएको बताए ।
उनले सरकारले व्यवस्थापिकाको अधिकार क्षेत्र मिच्दै अध्यादेशमार्फत ऐन बनाउन खोजेको भन्दै यसलाई संसदीय प्रणालीमाथिको हस्तक्षेपको रूपमा टिप्पणी पनि गरे ।
उनले भने, “संसदको बजेट अधिवेशनजस्तो महत्वपूर्ण अधिवेशन बोलाउनुपर्ने बेलामा पाँच पाँच वटा अध्यादेश ल्याएर सरकारले जनमतको अपमान गर्न खोजिरहेको छ । उहाँहरुसँग त एक हप्तादेखि १० दिनभित्रमा विधेयक नै पारित गर्नसक्ने जनमत छ नि । त्यसको सदुपयोग पो गर्नुपर्यो त । त्यसकारण यो असंवैधानिक र जनमतको अपमान हो ।”
दुलालले जनमतको सदुपयोग गरी संसदमार्फत विधेयक पारित गरेर गर्नुपर्नेमा अध्यादेशको सहारा लिनु गलत भएको जिकिर गरे।
प्रतिक्रिया दिनुहोस्