पोल्ट्रीमा साझेदारी गर्न निम्बस र के. बी. एग्रोबिच सम्झौता

काठमाडौँ । धादिङको धुनिबेसीमा पोल्ट्री प्रोसेसिङ उद्योग सञ्चालन र पोल्ट्री उत्पादनको बिक्री वितरणमा संलग्न के.बी. एग्रो एन्ड रिसर्च कम्पनी र शक्ति ब्रान्डमा पेलेट फिड समेत उत्पादन गर्दै आएको निम्बस ग्रुपले कुखुराजन्य वस्तुको बजार व्यवस्थापनमा साझेदारी गर्ने भएका छन् ।

एक कार्यक्रममा निम्बसका प्रबन्ध निर्देशक आनन्द बगरिया र के.बी. एग्रोका अध्यक्ष केशवराज थापाले सेयर खरिदबिक्री सम्बन्धी सम्झौतापत्रमा हस्ताक्षर गरेका छन् । के.बी. एग्रोका अध्यक्ष थापा नेपाल पेलेट फिड र जानुका ह्याचरीका सञ्चालक समेत हुन् ।

यसबाट साझेदारीमा संलग्न उद्योगी मात्र नभएर कुखुरापालक किसान र उपभोक्ता समेत लाभान्वित हुने अपेक्षा गरिएको छ । साझेदारी अन्तर्गत गुणस्तरीय दाना आपूर्ति, मासु र अण्डा उत्पादन तथा बजार व्यवस्थापन मासुको हकमा “शक्ति मिट” र अन्य परिकारको हकमा “इट फस्र्ट”को नामले हुने जनाइएको छ । के.बी. एग्रोसँगको सहकार्यसँगै गुणस्तरीय उत्पादनमा ख्याती कमाएको निम्बस पोल्ट्रीजन्य कारोबारमा प्रवेश गरेको छ ।

कुखरा उत्पादन, सही मूल्यमा गुणस्तरीय दानाको उपलब्धता र बजारमा उचित मूल्यमा उच्च गुणस्तरको पोल्ट्रीजन्य वस्तुको उपलब्धता सुनिश्चित गर्न दुई समूहले साझेदारी गरेको सम्झौतापछि के.बी. एग्रोले जारी गरेको विज्ञप्तिमा उल्लेख छ ।

“यसको उद्देश्य कुखुराको मासु, अण्डा तथा मासुजन्य पदार्थको उत्पादन लागत कम गर्नु, कुखुरापालक किसानलाई बढीभन्दा बढी लाभ प्राप्त हुने प्रणाली विकास गर्नु, पोल्ट्री फार्मलाई सहज रुपमा दाना आपूर्तिको व्यवस्था मिलाउनु, उत्पादित वस्तुको बजारीकरण गर्नु र देशभर बिक्री केन्द्र विस्तार गर्नु पनि हो,” विज्ञप्तिमा भनिएको छ, “उत्पादित पोल्ट्रीजन्य वस्तु पारदर्शी तरिकाले खरिद हुने हुँदा यसबाट कुखुरापालन व्यवसायमा संलग्न किसानलाई प्रत्यक्ष रुपमा लाभ हुने अपेक्षा गरिएको छ ।”

दुई प्रतिष्ठित व्यावसायिक घरानाको साझेदारीबाट धराशयी हुँदै गएको नेपालको पोल्ट्री व्यवसायलाई नयाँ ढंगबाट सञ्चालन गरी समग्र पोल्ट्री व्यवसायको विकास र विस्तारमा समेत सकारात्मक योगदान हुने अपेक्षा गरिएको छ । यसले गुणस्तरीय कुखुराको मासु तथा मासुजन्य पदार्थ उत्पादनमा नेपाललाई आत्मनिर्भर बनाउने नेपाल सरकारको लक्ष्यमा सहयोग गर्नुका साथै रोजगारीका थप अवसर सिर्जनामा पनि सकारात्मक योगदान गर्ने उल्लेख गरिएको छ ।

के.बी. एग्रोले धादिङको धुनिबेसीमा दैनिक ३२ हजार पन्छी प्रशोधन गर्न सक्ने क्षमताको अत्याधुनिक प्रोसेसिङ उद्योग सञ्चालन गरिरहेको छ । पूर्ण स्वचालित उक्त प्रोसेसिङ हाउसको ब्लास्ट फ्रिजिङ क्षमता २४ मेट्रिक टन र फ्रिजिङ क्षमता ५०० मेट्रिक टन रहेको जनाएको छ ।