काठमाडौँ । लागुपदार्थ सेवन गरी सवारी साधन चलाउँदै गरेका २ जना चालकलाई ट्राफिक प्रहरीले नियन्त्रणमा लिएको छ । काठमाडौँको नागढुङ्गाबाट शुक्रबार उनीहरूलाई नियन्त्रणमा लिएको ट्राफिक प्रहरीले जनाएको छ ।
बा१प १२१० नम्बरको पर्यटक बसका चालक काठमाडौँ महानगरपालिका–१ का ५३ वर्षीय सुरेश खड्की र ना६ख ६५०८ नम्बरका ट्रक चालक चितवनको राप्ती नगरपालिका ५ का ३१ वर्षीय विमल बर्तौलालाई ट्राफिक प्रहरीले नियन्त्रणमा लिएको हो ।
नेपाल प्रहरी अस्पतालको प्राविधिक सहयोगमा काठमाडौँ उपत्यका ट्राफिक प्रहरी कार्यालय, लागुऔषध नियन्त्रण ब्युरो र प्रहरी प्रभाग नागढुङगाको संयुक्त टोलीले चेक गर्दा लागुपदार्थ सेवन गरी सवारी साधन चलाइरहेको अवस्थामा फेलापरेका उनीहरूलाई आवश्यक अनुसन्धान तथा कारवाहीका लागि प्रहरी वृत्त थानकोट पठाइएको छ ।
यात्रु बोक्ने जस्तो संवेदनशील सवारी साधन चलाउने चालकलेनै लागुपदार्थ सेवन गरी सवारी साधन चलाउनु आफैँमा नियम विपरीत तथा दण्डनीय कार्य भएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक उमा प्रसाद चतुर्बेदीले बताए ।
प्रतिक्रिया दिनुहोस्