सांसद सापकोटाको प्रश्नः निजीकरण अध्यादेशको मस्यौदा कुन कर्पोरेट हाउसमा लेखिएको हो ?

काठमाडाैँ । नेकपा (माओवादी केन्द्र)का सांसद माधव सापकोटाले निजीकरण अध्यादेशको मस्यौदा कुन कर्पोरेट हाउसमा लेखिएको हो भन्दै सरकारलाई प्रश्न गरेका छन् ।

प्रतिनिधि सभाको बुधवारको बैठकमा निजीकण (पहिलो संशोधन) अध्यादेश,२०८१ अस्विकृत गरियोस् भन्ने पेश गर्दै सांसद सापकोटाले यस्तो प्रश्न गरेका हुन् । उनले लोकतान्त्रि मूल्यमान्यताको हिसाबले अध्यादेशको बाटो पुर्णरुपमा गलत भएको बताउनु बताए । सरकार अध्यादेश ल्याएर संविधानलाई जिस्क्याएको आरोप समेत लगाए । उनले गिरीबन्धुको गन्ध आउनेगरी सकारले भूमिसम्बन्धी अध्यादेश ल्याएको टिप्पणी गरे ।

“लोकतान्त्रिक मूल्यमान्यता हिसावले यो अध्यादेशको बाटो सर्वथा गलत छ । यसले सम्पूर्ण रुपमा संसदलाई नाङ्गो ढंगले झम्टिराखेको छ । त्यसैले विधि र मान्यताको हिसाबले एउटा होइन, दुईटा होइन, तीन वटा होइन, चार वटा होइन, पाँच वटा पनि होइन । ६ वटा अध्यादेश र ३२ वटा ऐन ल्याइयो । यही हो लाकेतन्त्र ? संविधानलाई जिस्क्याएर संविधानलाई खिसि गरेर ल्याइयो । हो पहिलेको सरकारले लगानी प्रवद्र्धन गर्नको लागि र मिटरब्याज पीडितको समस्या समाधान गर्न संसद नभएको बेलामा अध्यादेश ल्याएको थियो । ३२ वटा विधेयक ल्याउनु भयो । गिरिबन्धुको पूरै स्मेल आउने गरेर भूमिसम्बन्धीको विषय आयो,”उनले भने ।

उनले सरकारले अध्यादेशमा रहेका ‘कमा’ र ‘पूर्णविराम’ समेत परिवर्तन नगरी पास गर्न खोजेको आरोप समेत लगाए ।