काठमाडौं । त्रिभुवन अन्तर्राष्ट्रिय विमानस्थल क्षेत्रमा खाद्य स्वच्छता र गुणस्तर सम्बन्धी अनुगमनका क्रममा म्याद गुज्रेका तथा लेबल नखुलेका खाद्य पदार्थ फेला परेपछि एक व्यवसायलाई कारबाही गरिएको छ।
खाद्य प्रविधि तथा गुण नियन्त्रण विभागले दिएको जानकारी अनुसार वैशाख १४ गते प्रधानमन्त्री तथा मन्त्रिपरिषद्को कार्यालय र वाणिज्य, आपूर्ति तथा उपभोक्ता संरक्षण विभागसँगको संयुक्त अनुगमन टोलीले विमानस्थल परिसरमा रहेका खाद्य व्यवसायहरूको निरीक्षण गरेको थियो।
सो क्रममा ‘कान्तिपुर क्याफे’को गोदाम जाँच गर्दा उपभोग्य मिति समाप्त भएका विभिन्न खाद्य सामग्री भेटिएका हुन्।
अनुगमनका क्रममा पैचो टिमुर छोप, साल्टेड ब्ल्याक बिन, नेपाल आइस बियर लगायतका म्याद गुज्रेका वस्तुहरू फेला परेका थिए। त्यसैगरी उत्पादक र उपभोग्य मिति उल्लेख नभएको करिब १२ केजी ससेज फ्रिजमा भण्डारण गरिएको अवस्थामा भेटिएको विभागले जनाएको छ।
उक्त कसुरमा वाणिज्य, आपूर्ति तथा उपभोक्ता संरक्षण विभागले उपभोक्ता संरक्षण ऐन, २०७५ अनुसार क्याफेलाई २ लाख ५ हजार रुपैयाँ जरिवाना गरेको छ। जरिवाना रकम सात दिनभित्र बुझाउन आदेश दिइएको छ।
अनुगमनका क्रममा भेटिएका म्याद गुज्रेका तथा लेबल नखुलेका खाद्य पदार्थ जफत गरी नष्ट गरिएको छ। साथै, लेबल नखुलेको ससेज सम्बन्धी थप विवरणसहित तीन दिनभित्र उपस्थित हुन क्याफेलाई निर्देशन दिइएको छ।
विभागले गोदामको सरसफाइ नियमित गर्न र खाद्य सामग्री व्यवस्थित रूपमा भण्डारण गर्न समेत निर्देशन दिएको छ।
प्रतिक्रिया दिनुहोस्