काठमाडाैँ । नेकपा (एमाले) का अध्यक्ष केपी शर्मा ओलीले भोटेकोशी बाढीका कारण राष्ट्र निर्माणमा महत्वपूर्ण भुमिका खेल्ने दक्ष जनशक्तिको अपूरणीय क्षति भएको बताएका छन् ।
आइतबार पार्टी केन्द्रिय कार्यालय च्यासलमा रसुवाको बाढीपहिरो प्रभावित क्षेत्रको स्थलगत अनुगमनपछि महासचिव शंकर पोखरेलद्वारा प्रश्तुत प्रतिवेदन बुझ्दै अध्यक्ष ओलीले सो कुरा बताएका हुन् ।
अध्यक्ष ओलीले बेपत्ता र मृत्यु हुनेमा ४० वर्ष मुनिका इन्जिनियर तथा प्राविधिकहरू ठूलो संख्यामा रहेको उल्लेख गर्दै यसले मुलुकको पुनर्निर्माण र विकासका कार्यमा जनशक्तिको अभाव खड्किने चिन्ता व्यक्त गरे ।
अध्यक्ष ओलीले पीडितहरूको पुनस्र्थापना केवल घर निर्माणमा मात्र सीमित हुन नहुने बताए । पीडितहरूलाई सामान्य जीवनमा फर्काउन र उनीहरूको स्थायी आम्दानी सुनिश्चित गर्न प्रदेश सरकारले ‘बाढीपीडित पुनस्र्थापना कम्पनी’ जस्ता अवधारणामा काम गर्नुपर्ने उनको सुझाव थियो ।
पीडितहरूले उत्पादन गरेका वस्तुलाई ब्राण्डिङ गरेर बजार व्यवस्थापन गर्न सके उनीहरूको आर्थिक अवस्था सुधार हुने धारणा उहाँले राख्नुभयो । प्राकृतिक विपत्तिका कारण ज्यान गुमाएकाहरूको शव व्यवस्थापन निकै चुनौतीपूर्ण बनेको अध्यक्ष ओलीले उल्लेख गरे । धेरै शवहरू पहिरोमा पुरिएका र कतिपय नदीले बगाएर भारतसम्म पु¥याएकाले यथार्थ विवरण संकलन गर्न कठिन भइरहेको उनको भनाइ छ ।
उनले बाढीले क्षतविक्षत पारेका शवहरूको पहिचान गर्नसमेत समस्या भइरहेको भन्दै यस्तो अवस्थालाई ‘दर्दनाक’ संज्ञा दिए । राहत वितरण कार्यलाई व्यवस्थित र न्यायोचित बनाउन अध्यक्ष ओलीले निर्देशन दिए ।
कतै दोहोरिने र कतै अभाव हुने स्थिति आउन नदिन एकद्वार प्रणाली र तथ्याङ्कका आधारमा कम्तीमा एक महिना पुग्ने खाद्यान्न प्याकेज उपलब्ध गराउनुपर्नेमा उनले जोड दिए ।
विशेषगरी दीर्घरोगीहरू (ब्लड प्रेसर, सुगर आदि) का लागि नियमित औषधिको अभाव हुन नदिन स्वास्थ्य टोली परिचालन गरी तत्काल सम्बोधन गर्न उनले ध्यानाकर्षण गराए ।
विपद्को यस घडीमा वागमती प्रदेश कमिटीलाई केन्द्र बनाएर सबै प्रदेश र जिल्ला कमिटीहरूले समन्वयकारी भुमिका खेल्नुपर्ने अध्यक्ष ओलीले बताए । उनले राजधानी प्रदेश (वागमती) लाई अझ सक्रियताका साथ परिचालन हुन निर्देशन दिँदै यो विशाल चुनौतीलाई सामना गरेर जनजीवन सामान्यीकरण गर्न एमाले दृढताका साथ लाग्ने प्रतिबद्धता व्यक्त गरे ।–न्युज एजेन्सी नेपाल
प्रतिक्रिया दिनुहोस्