काठमाडौँ । इन्जिनियरिङ ज्ञान नेपाल एलसिके युनाइटेड स्टार्सको सहकार्यमा हिजो (साेमबार) चन्द्रागिरीका दुई विद्यालयहरूमा फोहोर व्यवस्थापनसम्बन्धी चेतना कार्यक्रम सफलतापूर्वक सम्पन्न भएकाे छ । कार्यक्रमले विद्यार्थीहरूलाई सही तरिकाले फोहोर व्यवस्थापन गर्ने र यसको वातावरणमा पर्ने प्रभावका बारेमा जानकारी दिने उद्देश्य राखेको थियो।
जनविकास माध्यमिक विद्यालय, चन्द्रागिरी वडा नम्बर ८ का ८० विद्यार्थी र १० शिक्षक तथा श्री भैरव नाथ माध्यमिक विद्यालय, बोसी गाउँ, चन्द्रागिरी वडा नम्बर १० का ३० विद्यार्थी र ५ शिक्षकले कार्यक्रममा सहभागीता जनाएका थिए। कार्यक्रमको नेतृत्व इन्जिनियरिङ ज्ञान नेपालको फोहोर व्यवस्थापन विभागका प्रमुख र फोहोर व्यवस्थापनमा विद्यावारिधि गरिरहेका अनिल कुमार बरालले गरेका थिए। उनले फोहोर व्यवस्थापन गर्ने तरिका र यसले वातावरणमा पार्ने सकारात्मक प्रभावका बारेमा महत्वपूर्ण जानकारी दिए।
पर्यावरणविद् डा. बिदुर ढुंगेलले जलवायु परिवर्तन र विश्वव्यापी तापमान वृद्धिको बारेमा जानकारी गराए भने इन्जिनियर भीमबहादुर बम्जनले घरमा कम्पोस्ट बनाउने तरिकाको व्यावहारिक जानकारी दिए।
लायन्स क्लब अफ काठमाडौँ युनाइटेड स्टार्सले पनि कार्यक्रममा महत्वपूर्ण भूमिका खेलेको थियो। सेवा प्रमुख अश्विन श्रेष्ठले दुबै विद्यालयलाई शान्ति पोस्टर प्रतियोगितामा सहभागी गराइएको र उत्कृष्ट पोस्टरलाई पुरस्कार दिइने घोषणा गरेका थिए ।
कार्यक्रमको अन्त्यमा दुबै विद्यालयका शिक्षक र विद्यार्थीलाई कार्यक्रममा सक्रिय सहभागिताका लागि प्रमाणपत्र प्रदान गरिएकाे थियाे । विद्यालयका प्रधानाध्यापक र शिक्षकहरूले अनिल कुमार बराल र कार्यक्रम आयोजक टोलीलाई धन्यवाद व्यक्त गर्दै यसले विद्यालय र समुदायका लागि धेरै लाभकारी भएको बताए।
प्रतिक्रिया दिनुहोस्