काठमडौँ । एभरेष्ट बैंकको लिमिटेडले निष्काशन गरेको ऋण पत्रमा पर्याप्त लगानी नभएपछि आवेदन दिने समय थप भएको छ । बैंकले फागुन १८ गतेदेखि ऋणपत्र निष्काशन तथा बिक्री खुला गरेको थियो । फागुन १८ गतेदेखि फागुन २१ गतेसम्म बिक्री खुला भएको ऋणपत्रमा पर्याप्त आवेदन नपरेपछि चैत ३ गतेसम्मका लागि आवेदन दिने समय थप भएको हो । बैंकले १० वर्ष अवधिको वार्षिक ७.५० प्रतिशत ब्याजदरमा ‘एभरेष्ट बैंक लिमिटेड ऋणपत्र २०९१’ निष्काशन गरेको थियो ।
सर्वसाधारणका लागि बैंकले ११ लाख ४० हजार कित्ता ऋण पत्रको लागि आवेदन माग गरे पनि फागुन २० गतेसम्म ५ लाख २० हजार ४७४ कित्ताको लागि मात्र आवेदन परेको छ । बैंकले सर्वसाधारणको लागि प्रति कित्ता एक हजार रुपैयाँका दरले एक अर्ब ८० करोड रुपैयाँको ऋणपत्र सार्वजनिक गरेपनि फागुन २० गतेसम्म ५२ करोड ४ लाख ७४ हजार रुपैयाँको मात्र आवेदन गरेको छ ।
बैंकले प्रतिऋणपत्र एक हजार अंकित दरका ३ अर्ब रुपैयाँ बराबरको ३० लाख कित्ता ऋणपत्र निष्काशन गरेको थियो । सोमध्ये ६० प्रतिशत अर्थात १ अर्ब ८० करोड रुपैयाँ बराबरको १८ लाख कित्ता ऋणपत्र व्यक्तिगत तवरबाट बाँडफाँट गरिनेछ भने बाँकी ४० प्रतिशत अर्थात १ अर्ब २० करोड रुपैयाँ बराबरको १२ लाख कित्ता सर्वसाधारणमा बाँडफाँट गरिनेछ। सर्वसाधारणमा बाँडफाँट गरिने ऋणपत्रमध्ये ५ प्रतिशत अर्थात ६० हजार कित्ता ऋणपत्र सामूहिक लगानी कोषहरुका लागि छुट्याइएको छ।
सो ऋणपत्रमा लगानीकर्ताले न्यूनतम २५ कित्ताका र अधिकतममा १२ लाख कित्ताका लागि आवेदन दिन सकिनेछ।
बैंकको धितोपत्र निष्काशन तथा बिक्री प्रबन्धक लक्ष्मी सनराइज क्यापिटल लिमिटेड रहेको छ। ऋणपत्र निष्काशनका लागि गराएको क्रेडिट रेटिङ्गमा इक्रा नेपालले बैंकलाई इक्रा एनपी इस्यूअर रेटिङ्ग डबल ए माइनस प्रदान गरेको छ।
प्रतिक्रिया दिनुहोस्