काठमाडाैँ । रामेछापको मन्थलीमा राष्ट्रिय दुग्ध विकास बोर्डको सहकार्य तथा नेपाल डेरी एसोसिएसनको आयोजनामा पाँच दिने ‘मिल्क एनालाइजर सञ्चालन, संभार तथा मर्मत’ तालिम आजबाट सुरू भएको छ। फागुन २१ देखि २५ गतेसम्म सञ्चालन हुने उक्त तालिममा रामेछाप, सिन्धुली र दोलखाका गरी २५ जना प्रशिक्षार्थी सहभागी भएका छन्।
तालिमको उद्घाटन मन्थली नगरपालिकाका मेयर लब श्रेष्ठको प्रमुख आतिथ्यतामा सम्पन्न भएका थियाे। कार्यक्रममा नेपाल डेरी एसोसिएसन बागमती प्रदेशका सदस्य एवं कार्यक्रम संयोजक भानु श्रेष्ठ, प्रशिक्षक गोविन्द शर्मा, मन्थली दुग्ध सहकारीका अध्यक्ष धुर्व थापा, सहकारीकर्मी प्रज्ञान खड्का, प्रमोद श्रेष्ठ लगायतको उपस्थिति रहेको थियो।
प्रशिक्षक गोविन्द शर्माले तालिमको उद्देश्यबारे प्रकाश पार्दै मिल्क एनालाइजर प्रविधिको प्रभावकारी सञ्चालन, संभार तथा मर्मतका विषयमा जानकारी गराए। कार्यक्रमका स्वागत वक्ता केशर खत्रीले सहभागीहरूलाई शुभकामना दिएका थिए।
सो अवसरमा मेयर लब श्रेष्ठले समयानुकूल नयाँ प्रविधिको अपनत्व गर्दै तालिममा सिकेका सीपहरू व्यवहारमा उतार्न आग्रह गरे। नेपाल डेरी एसोसिएसनका अध्यक्ष प्रहलाद दाहालले डेरी व्यवसायलाई प्रविधिसँग जोड्दै यस प्रकारका तालिमहरू सरोकारवाला निकायहरूसँग सहकार्य गर्दै निरन्तर सञ्चालन गरिने बताए।
बागमती प्रदेश अध्यक्ष टिकाप्रसाद घिमिरेले दुग्ध किसान र डेरी उद्योगीहरूको हितका लागि राष्ट्रिय दुग्ध विकास बोर्डले निरन्तर यस्ता कार्यक्रमहरू आयोजना गरिरहेको जानकारी गराए।
तालिममा सहभागी तीनवटा जिल्लाका प्रशिक्षार्थीहरूलाई धन्यवाद व्यक्त गर्दै आयोजकहरूले दूध व्यवसायलाई प्रविधिमैत्री बनाउने लक्ष्यका साथ यस्ता कार्यक्रम निरन्तर सञ्चालन गरिने बताए।
प्रतिक्रिया दिनुहोस्