काठमाडाैँ । नेपाल पोल्ट्री महासंघले पोल्ट्री उद्योगलाई दीर्घकालीन रूपमा समृद्ध बनाउन नीतिगत परिवर्तन आवश्यक रहेको भन्दै अर्थमन्त्रीलाई ज्ञापनपत्र बुझाएको छ। महासंघका प्रतिनिधिहरूले मंगलबार अर्थ मन्त्रालय सिंहदरबार पुगेर पोल्ट्री क्षेत्रमा देखिएको आर्थिक संकट, कच्चा पदार्थको महँगी र व्यवसायीहरूलाई परेको समस्याबारे जानकारी गराएका हुन्।
महासंघका अनुसार नेपाल पोल्ट्री उद्योगमा करिब १६० अर्ब रुपैयाँको लगानी छ जसले प्रत्यक्ष तीन लाख र अप्रत्यक्ष पाँच लाख जनशक्तिलाई रोजगारी दिएको छ। पोल्ट्री क्षेत्रले नेपाललाई कुखुराको मासु, अण्डा, चल्ला तथा दानामा आत्मनिर्भर बनाउन महत्त्वपूर्ण योगदान दिएको महासंघको दाबी छ।
महासंघले हाल पोल्ट्री क्षेत्रमा गहिरो आर्थिक संकट उत्पन्न भएको जनाएको छ। काेभिड महामारीपछि व्यवसायीहरूले अपूरणीय क्षति बेहोर्नु परेको र पछिल्लो समय रसिया–युक्रेन युद्धका कारण कच्चा पदार्थ जस्तै मकै, भटमास पिना, पशुपन्छी औषधि तथा फिड सप्लिमेण्ट्सको मूल्य अत्यधिक वृद्धि भएकाले उत्पादन लागत बढेको महासंघले जनाएको छ। लागत अनुसारको मूल्य नपाउँदा ह्याचरी उद्योग, कुखुरा पालक किसान, अण्डा उत्पादक, दाना उद्योग तथा अन्य व्यवसायीहरू आर्थिक सङ्कटमा परेको महासंघको भनाइ छ।
महासंघले पोल्ट्री उद्योगलाई दीर्घकालीन रूपमा स्थायित्व दिन सरकारको नीति, अनुदान तथा सहुलियत आवश्यक रहेको बताउँदै अर्थ मन्त्रालयसँग ठोस पहलको माग गरेको छ।
प्रतिक्रिया दिनुहोस्