वीरगन्ज महानगरमा लगाइएको निषेधाज्ञा हट्यो

काठमाडौँ । वीरगन्ज महानगरपालिकाका केही क्षेत्रमा जारी निषेधाज्ञा हटाइएको छ। जिल्ला प्रशासन कार्यालय पर्साले आज विहान ७ बजेबाट लागू हुने गरी निषेधाज्ञा हटाइएको जानकारी दिएको हो।

जिल्ला सुरक्षा समितिको मिति २०८१ साल चैत ३१ गतेको निर्णयका आधारमा स्थानीय प्रशासन ऐन २०२८ को दफा ६ (३क) अनुसार निषेधाज्ञा जारी गरिएको थियो। सो निर्णयअनुसार वीरगन्ज महानगरपालिका भित्र पर्ने पूर्वतर्फ बाईपास रोड, पश्चिमतर्फ सिर्सिया पुल, उत्तरतर्फ गण्डक चौक र दक्षिणतर्फ शंकराचार्य गेटसम्मको क्षेत्र निषेधित क्षेत्र घोषणा गरिएको थियो।

तर पछिल्लो अवस्थाको समीक्षा गर्दै जिल्ला सुरक्षा समितिले हिजाे बसेको बैठकबाट निषेधाज्ञा हटाउने निर्णय गरेको हो। सो निर्णयअनुसार वैशाख ५ गते विहान ७ बजेदेखि निषेधाज्ञा पूर्ण रूपमा हटाइएको प्रमुख जिल्ला अधिकारी गणेश अर्यालले जानकारी दिए।

गत शनिबार हनुमान् जयन्तीका अवसरमा आयोजित शोभायात्रामा दुईपक्षबीच झडप भएपछि महानगरका विभिन्न भागमा कर्फ्यू आदेश जारी गरेको थियो।