विनोद चौधरी र बिल गेट्सबिच भेटवार्ता: स्वास्थ्य र रोजगारी क्षेत्रका विषयमा छलफल

काठमाडौँ । चौधरी ग्रुपका अध्यक्ष एंव सांसद विनोद चौधरीले सिङ्गापुरमा आयोजित फिलान्थ्रपी एसिया एलायन्स-२०२५ (पिएए-२०२५) को अवसरमा माइक्रोसफ्टका सह-संस्थापक बिल गेट्ससँग भेटवार्ता गरेका छन्। उनले उक्त भेटलाई ऐतिहासिक र अर्थपूर्ण भएको बताएका छन्।

“पिएए को अवसरमा बिल गेट्ससँग भेट हुनु गौरवको विषय हो। नेपालका स्वास्थ्य र रोजगारी क्षेत्रका गम्भीर चुनौतीबारे हाम्रो गहिरो र अर्थपूर्ण छलफल भयो,” फेसबुकमार्फत चौधरीले लेखेका छन् ।

चौधरीले गेट्स फाउन्डेसनसँगको दशक लामो सहकार्यप्रति कृतज्ञता व्यक्त गरेका छन्। उनले २०७२ सालको भूकम्प, कोभिड महामारीको सामना र ‘बलियो नेपाल’ अभियानमार्फत पोषण सुधारको काममा गेट्स फाउन्डेसनको भूमिकालाई स्मरण गरेका छन्।

उनले आगामी दिनमा गेट्स फाउन्डेसनका प्रभावकारी स्वास्थ्य कार्यक्रमहरू नेपालमा विस्तार गर्ने तयारी रहेको जानकारी पनि दिएका छन्।