काठमाडौँ । एनआइबिएल इक्विटी पार्टनर्स र हिमालयन जाभा कम्पनीबिच लगानी सम्झौतामा हस्ताक्षर भएको छ ।
बिहीबार नक्सालस्थित आयोजित एक समारोहमा एनआइबिएल इक्विटी पार्टनर्सको तर्फबाट प्रमुख कार्यकारी अधिकृत शिवान्त बहादुर पाँडे र हिमालयन जाभाको तर्फबाट संस्थापक गगन प्रधानले सम्झौतामा हस्ताक्षर गरेका छन् ।
नेपाली ब्रान्ड र मौलिकतालाई विश्व बजारमा पुर्याउने र प्रवर्धन गर्ने उद्देश्यका साथ लगानी सम्झौता गरिएको छ ।
सम्झौता कार्यक्रममा प्रमुख कार्यकारी अधिकृत शिवान्त बहादुर पाँडेले यो लगानीले नेपाली व्यवसायलाई विश्व बजारमा प्रतिस्पर्धा गर्न थप सक्षम र सबल बनाउने विश्वास व्यक्त गरे ।
उनले भने,“हिमालयन जाभालाई अन्तर्राष्ट्रिय विश्व बजारमा स्थापित गर्न चाहेका छौँ र यो हाम्रो दीर्घकालीन प्रतिबद्धता समेत हो ।”
हिमालयन जाभाका संस्थापक गगन प्रधानले एनआइबिएल इक्विटी पार्टनर्सको लगानीले वैश्विक बजारमा पुग्न थप आत्मबल प्राप्त भएको धारणा राखे ।
“यो साझेदारी हाम्रो यात्राको एक महत्वपूर्ण मोड हो, स्वदेशमै रोजगारी सिर्जना गर्ने र व्यावसायिक तालिम मार्फत् दिगो वृद्धितर्फ हामी प्रतिबद्ध छौँ”, उनले भने ।
सन् १९९९ मा स्थापना भएको कफी ब्रान्डले नेपालमा ७० भन्दा बढी आउटलेट, १८ हिमालयन जाभा एक्सप्रेस आउटलेट र दुईवटा उच्च श्रेणीको ‘ग्यालरी बाई हिमालयन जाभा’आउटलेटहरू सञ्चालन गर्दै आइरहेको छ ।
प्रतिक्रिया दिनुहोस्