काठमाडाैँ । नेपाल चेम्बर अफ कमर्सले हीरक जयन्तीको अवसरमा आज राजधानी काठमाडौँमा वाकाथन कार्यक्रम सम्पन्न गरेको छ। संस्थाको ७५औं वार्षिकोत्सव–हीरक जयन्ती–का अवसरमा चेम्बरले वर्षभर विभिन्न कार्यक्रम आयोजना गर्दै आएको छ।
हीरक जयन्ती मूल समारोह समितिको समन्वयमा तथा शिक्षा तथा खेलकुद समितिद्वारा आयोजित वाकाथन जमलस्थित चेम्बर भवनबाट सुरु भएको थियो। कार्यक्रम रानीपोखरी, नेपाल प्रहरी प्रधान कार्यालय (उलहाउस), जनबहाल, मखन, दरबार स्क्वायर हुँदै झोंछेमा पुगेर समापन गरिएको चेम्बरले जनाएको छ।
कार्यक्रम हीरक जयन्ती मूल समारोह समितिका सभापति तथा चेम्बरका पूर्वअध्यक्ष राजेशकाजी श्रेष्ठको अगुवाइमा सम्पन्न भयो। वाकाथनमा चेम्बरका पदाधिकारी, कार्यसमिति सदस्य, निजी क्षेत्रका प्रतिष्ठित व्यक्तित्व तथा खेलाडीलगायत करिब ३०० जनाले सहभागिता जनाएका थिए।
कार्यक्रमलाई सम्बोधन गर्दै सभापति श्रेष्ठले मुलुककै पुरानो निजी क्षेत्रीय संस्था चेम्बरले आफ्नो ७५औँ वर्षगाँठ भव्य रूपले मनाउन विभिन्न कार्यक्रम सञ्चालन गरेको बताए। वर्तमान आर्थिक परिस्थितिमा उद्यमी तथा व्यवसायीहरूको मनोबल बढाउन यस्ता गतिविधिले महत्वपूर्ण भूमिका खेलेको उनले उल्लेख गरे।
त्यसैगरी, चेम्बरका अध्यक्ष कमलेश कुमार अग्रवालले वाकाथनमार्फत काठमाडौंका ऐतिहासिक तथा सांस्कृतिक महत्वका स्थानहरूको प्रवर्द्धनमा समेत योगदान पुगेको बताए।
शिक्षा तथा खेलकुद समितिका सभापति रुपक राजवंशीले कार्यक्रममा सक्रिय सहभागिता जनाउने सबैलाई धन्यवाद व्यक्त गरे।
साढे सात दशकदेखि निरन्तर क्रियाशील नेपाल चेम्बर अफ कमर्सले मुलुकको समग्र आर्थिक विकास, निजी क्षेत्रको क्षमता अभिवृद्धि तथा व्यवसायिक वातावरण सुदृढीकरणका लागि गरेको योगदानलाई हीरक जयन्ती वर्षभर विभिन्न कार्यक्रममार्फत उजागर गरिने चेम्बरले जनाएको छ।
प्रतिक्रिया दिनुहोस्