काठमाडौँ । राष्ट्रिय स्वतन्त्र पार्टीका वरिष्ठ नेता बालेन्द्र शाहले चैत १० गते प्रधानमन्त्रीको सपथ ग्रहण गर्ने तयारी भएको छ ।
चैत १० गते नै प्रधानमन्त्रीका रूपमा शाहले पद तथा गोपनीयताको सपथ लिने आन्तरिक तयारी भएको हो ।
शाहको सपथग्रहण लगत्तै मन्त्रीहरूको सपथ ग्रहण हुने छ । उच्चस्रोतका अनुसार शाहले सपथ ग्रहणका लागि चैत १० गते शुभ साइत निकालेका छन् ।
राष्ट्रिय स्वतन्त्र पार्टीले चैत ८ देखि ९ गतेभित्र सबै निर्णय गरिसक्ने र १० गते शाहको सपथ ग्रहण गराउने तयारी गरेको छ ।
उच्चस्रोतले भन्यो,“चैत १० गते सपथग्रहणका लागि शुभसाइत निस्किएको छ र पार्टीको तयारी पनि त्यसैअनुसार छ ।”
रास्वपाले मन्त्रीपरिषद्मा जाने सबैमन्त्रीको सपथ ग्रहण पनि चैत १० गते नै गर्ने गरि तयारी गरेको छ । स्रोतले भन्यो, “अब विगतजस्तो गठबन्धनसँग छलफल सल्लाह गरिसक्न परेन त्यसैले किस्तामा मन्त्रीपरिषद विस्तार किस्तामा हुँदैन । एकैपटक गर्ने निर्णय भएको छ ।”
रास्वपाले मन्त्रीपरिषदमा भौगोलिक, जातीय, क्षेत्रीय, चुनावी नतिजा, विज्ञाता, लैंङ्गिकता सबै मिलाएर मन्त्रीपरिषद् छनौटको तयारी गरेको छ ।
२०८२ फागुन २१ गते भएको प्रतिनिधि सभा चुनावमा रास्वपाको झण्डै एकल दुइतिहाइ बहुमत आएको छ । रास्वपाले चुनाव अघि नै शाहलाई प्रधानमन्त्रीको उम्मेदवार घोषणा गरेर गएको थियो ।
शाहलाई प्रधानमन्त्री नियुक्त गर्नुअघि निर्वाचन आयोगले राष्ट्रपतिलाई चुनावी नतिजाको विवरणसहितको प्रतिवेदन हस्तान्तरण गर्ने छ ।
लगत्तै राष्ट्रपति रामचन्द्र पौडेलले संवैधानिक व्यवस्थाअनुसार प्रधानमन्त्री नियुक्तिका लागि आव्हान गर्नेछन् । यी सबै प्रक्रिया चैत १० गतेअघि नै हुनेछ ।
प्रतिक्रिया दिनुहोस्