काठमाडाैँ । नेकपा (एमाले) का सांसद राजेन्द्रकुमार राईले मुलुकमा भइरहेका सवारी दुर्घटनाका मुख्य कारणहरूलाई विज्ञहरूले नजरअन्दाज गरेको बताएका छन् ।
मंगलबार पूर्वाधार विकास समितिको बैठकमा बोल्दै सांसद राईले विज्ञहरूको कार्यक्षमता र सडक सुरक्षाका सवालमा प्रश्न उठाएका हुन् । बैठकमा आफ्नो धारणा राख्दै सांसद राईले सवारी दुर्घटना हुनुमा सडकको अवस्था मात्र नभई चालकले गर्ने मोबाइलको प्रयोग र गाडीभित्र बजाइने चर्को संगीत मुख्य जिम्मेवार रहेको दाबी गरे ।
सांसद राईले सडक निर्माण र गुणस्तरका सन्दर्भमा बेलायत सरकारले वि.सं. २०३५ सालमा निर्माण गरेको धरान–धनकुटा सडकको उदाहरण दिँदै हालका योजनाहरूको टिकाउपनमाथि प्रश्न उठाए । उनले चीनमा रातारात ठूला निर्माण कार्य सम्पन्न हुने गरेको प्रसङ्ग उल्लेख गर्दै नेपालको कार्यशैलीमा सुधारको आवश्यकता औँल्याए ।
सांसद राईले आगामी कानुनमा सवारी चलाउँदा मोबाइल प्रयोग गर्न नपाइने र पिकनिक वा अन्य यात्रामा जाँदा गाडीभित्र हुने चर्को नाचगानलाई प्रतिवन्ध लगाउने व्यवस्था गर्न सुझाव दिए ।
उनले भने, “अहिले सवारी दुर्घटनाका दुईवटा प्रमुख कारण छन् । एउटा मोबाइल फोन र अर्को गाडीभित्र डिजे जस्तै गरी बजाइने गीत–संगीत । यसले चालकको ध्यान अन्यत्र मोड्छ, तर विज्ञ भनिएकाहरूले यसतर्फ ध्यान दिएको पाइँदैन । ब्रिटिस सरकारले बनाएको बाटो अहिलेसम्म भत्किएको छैन, तर लेउती खोला क्षेत्रमा वर्षेनी पहिरो जाने र सडक अवरुद्ध हुने समस्या छ । पटक–पटक एउटै मन्त्रालयमा रहेका सचिव र प्राविधिकहरूले यसको स्थायी समाधान किन खोज्न सक्नुभएन ?”
कोशी राजमार्ग लगायतका राष्ट्रिय राजमार्गहरू कुनैपनि बहानामा अवरुद्ध हुन नहुनेमा जोड दिँदै उनले सडक अवरुद्ध भएमा तत्काल खोल्ने वातावरण मिलाउन सरकार र सम्बन्धित मन्त्रालयलाई निर्देशन दिन समिति सभापतिलाई आग्रह गरे । देश निर्माणका लागि कुरा मात्र नभई दिमाग र पौरख चलाउनुपर्ने उनको भनाइ छ ।
प्रतिक्रिया दिनुहोस्