कानुनअनुसार गाडी आयात गरिएकाे हाेः साइमेक्स इंक

काठमाडाैँ । चालु आर्थिक वर्ष २०८३/८४ को बजेट सार्वजनिक हुनुअघि नेपाल भित्रिएका तथा भन्सार जाँचपास भएका विद्युतीय सवारी साधन भित्रिएकाे भन्दै आएकाे समाचारप्रति साइमेक्स इंकले ध्यानाकर्षण भएकाे जनाएकाे छ ।

नेपालमा बिवाइडीका सवारीसाधनको आधिकारिक वितरकका रूपमा साइमेक्स इंक रहेकाे छ ।

साइमेक्स इंकले सञ्चारमाध्यममा उल्लेख गरिएका सवारीसाधनहरू नेपाल सरकारका प्रचलित कानुन, भन्सारसम्बन्धी नियमावली तथा प्रक्रियाअनुसार पूर्ण रूपमा आयात तथा जाँचपास गरिएकाे जनाएकाे छ ।

कुनै पनि चरणमा विशेष सुविधा, प्राथमिकता प्राप्त प्रक्रिया वा अनधिकृत भन्सार व्यवस्थाबाट साइमेक्स इंकले लाभ नलिएको र त्यस्तो व्यवस्थाका लागि अनुरोध नगरेको उल्लेख गरेकाे छ ।

कम्पनीका अनुसार ग्राहकबाट पहिले नै बुकिङ सुनिश्चित भइसकेका कारण ती बुकिङ पुरा गर्न तथा नेपालमा विद्युतीय सवारीसाधनको बढ्दो माग सम्बोधन गर्न सवारी साधन आयात गरिएकाे हुन्। बिवाइडीको उत्पादन तालिका, ढुवानी उपलब्धता, नियमित व्यावसायिक योजना तथा यातायात र ढुवानी व्यवस्थापनसम्बन्धी चुनौतीहरूलाई ध्यानमा राखेर आयात गरेकाे जनाएकाे छ।

सम्पूर्ण आयात तथा भन्सार प्रक्रिया नेपालका प्रचलित कानुन तथा नियामकीय व्यवस्थाअनुसार नै सम्पन्न गरिएको कम्पनीकाे दाबी छ ।

साइमेक्स इंकले सरकारी निकायसँग समन्वय गरी कर परिवर्तनबाट बच्न खोजेको वा कुनै अनुचित लाभ लिएको भन्ने आरोप निराधार, असत्य तथा कम्पनीको प्रतिष्ठामा आघात पुर्‍याउने खालकाे रहेकाे जनाएकाे छ ।

कम्पनीले आयातसम्बन्धी सम्पूर्ण गतिविधिहरू नियमित व्यावसायिक आवश्यकता, मौज्दात व्यवस्थापन, ढुवानी तालिका तथा प्रचलित कानुनका आधारमा योजना बनाई सञ्चालन गरिने उल्लेख गरेकाे छ ।

साइमेक्स इंक कुनै पनि वैधानिक अनुसन्धान वा छानबिन गर्नकाे लागि लाई स्वागत गरेकाे छ । सत्यतथ्य स्थापित गर्न आवश्यक सम्पूर्ण कागजातहरू आयात सम्बन्धी रेकर्ड, भन्सार घोषणा विवरण, ढुवानी अभिलेख, सीमा प्रवेशसम्बन्धी कागजात, भुक्तानी विवरण तथा जाँचपास स्वीकृतिसम्बन्धी दस्तावेजहरू सम्बन्धित निकायलाई उपलब्ध गराउन पूर्ण रूपमा तयार रहेको कम्पनीले जनाएकाे छ ।

सञ्चारमाध्यम तथा सरोकारवाला सबै पक्षलाई आधिकारिक अभिलेख तथा सम्बन्धित निकायबाट तथ्य पुष्टि नगरी निष्कर्षमा नपुग्न तथा सार्वजनिक भ्रम सिर्जना गर्ने वा वैधानिक रूपमा सञ्चालन भइरहेका व्यवसायहरूको प्रतिष्ठामा अनुचित क्षति पु-याउने खालका आरोप वा सामग्री प्रकाशन नगर्न साइमेक्स इंकले अनुराेध गरेकाे छ ।

कम्पनीका अनुसार नेपालको वातावरणीय लक्ष्य प्राप्ति, इन्धन आयातमा कमी तथा दिगो यातायातको पहुँच विस्तार गर्न इलेक्ट्रिक मोबिलिटी सेक्टरले महत्वपूर्ण योगदान पु-याउँदै आएको छ।

साइमेक्स इंकले धेरै वर्षदेखि नेपालको अटोमोटिभ तथा क्लिन इनर्जी रूपान्तरणको यात्रामा विश्वासिलो साझेदारका रूपमा योगदान दिँदै आएको जनाएकाे छ। इमान्दारिता, कानुनको पालना, पारदर्शिता तथा जवाफदेहिताका साथ नेपाली उपभोक्ताको सेवा गर्न निरन्तर प्रतिबद्ध रहेकाे जनाउँदै कम्पनीले आयातित गाडीकाे संख्या, माेडेल, आयात मिति लगायतका विवरण पनि प्रेस विज्ञप्तिमार्फत सार्वजनिक गरेकाे छ ।

कम्पनीका अनुसार यसका अतिरिक्त, २२६ वटा सवारीसाधन चीनतर्फको भन्सार क्षेत्रमा आइपुगेका भए पनि हालसम्म भन्सार जाँचपास प्रक्रिया सम्पन्न भएको छैन।

यो पनि पढ्नुहोस

विद्युतीय गाडी पक्राउ प्रकरण : अर्थ मन्त्रालय र भन्सार विभागले केन्द्रबाट खटायो अध्ययन टोली