काठमाडाैँ । नेपाल उद्योग परिसंघका उपाध्यक्ष भीमप्रसाद घिमिरेले मुलुकको अर्थतन्त्र अझै जटिल अवस्थामा रहेको बताएका छन्।
आइतबार प्रतिनिधि सभाको अर्थसमितिमा मौद्रिक नीतिका बारेमा भएको छलफलमा उनले अर्थतन्त्रलाई सुधार गर्न मौद्रिक नीतिले ध्यान दिनुपर्ने बताएका हुन् ।
उनले हाल न्युन ब्याजदरका बाबजुद पनि निजी क्षेत्रबाट कर्जाको माग बढ्न नसेकाे बताए । नेपाल राष्ट्र बैंकले पछिल्ला वर्षहरूमा अर्थतन्त्रलाई चलायमान बनाउन केही नीतिगत लचकता र सुधारका प्रयास गरेका कारण हाल नीतिगत दर र ब्याजदर न्युन स्तरमा पुगेको उनको भनाइ छ ।
तर कर्जा माग अत्यन्त कमजोर रहेकाले बैंकिङ प्रणालीमा ठूलो परिमाणमा लगानीयोग्य रकम निष्क्रिय रहेको उनले बताए । उनकाअनुसार गत आर्थिक वर्षको तुलनामा हाल निजी क्षेत्रतर्फको कर्जा प्रवाह निक्षेप वृद्धि निकै पछाडि परेको छ ।
बजारमा माग संकुचित भएकै कारण उद्योग–व्यवसाय पूर्ण क्षमतामा सञ्चालन हुन नसकेको उनको भनाइ छ । उद्योगहरुले नयाँ कर्मचारी भर्ना, प्रविधिमा लगानी तथा व्यवसाय विस्तार गर्न समेत नसकेको उनले बताए । उनले निजी क्षेत्रले लगानीमैत्री वातावरणका लागि नीतिगत स्थिरता, स्पष्टता र पूर्वानुमानयोग्य नीति माग गर्दै आएपनि पछिल्लो एक वर्षमा सरकार तथा नियामक निकायबाट आएका अनपेक्षित नीतिगत परिवर्तनले लगानीकर्ताको मनोबल कमजोर बनाएको बताए ।
राज्यप्रति निजी क्षेत्रको विश्वास नभएको कारण पनि कर्जाको माग अपेक्षाअनुसार बढ्न नसकेको उनको भनाइ छ । वाह्य क्षेत्रका अधिकांश आर्थिक सूचकहरू निरन्तर सुधारोन्मुख रहेको भएपनि आन्तरिक आर्थिक गतिविधि लामो समयदेखि सुस्त रहनु मुलुकको विकास लागि चुनौतीपूर्ण रहेको उनको भनाइ छ ।
उनले हाल स्थायी सरकार बनेकोले निजी क्षेत्रमैत्री, लगानीयोग्य वातावरण निर्माण गरी रोजगारी सिर्जना गर्ने तथा राजश्व वृद्धि गर्नतिर लाग्न सरकारलाई आग्रह गरे । सोहीअनुसार राष्ट्र बैकले पनि मौद्रिक नीति ल्याउनुपर्ने उनको भनाइ छ ।
प्रतिक्रिया दिनुहोस्